ഇം​ഗ്ലീ​ഷ് ചെ​റു​ക​ഥ​യെ​ഴു​ത്തി​ലെ സാ​മാ​ന്യ​ഗ​തി ഭാഷാ ചെ​റു​ക​ഥ​യെ​ഴു​ത്തി​ലും കാ​ണാ​മെ​ന്നു് ഏറെ​ക്കു​റെ ശരി​യാ​യി പറയാം. ഒരു ചെ​റു​ക​ഥ​യ്ക്കു് ഒരു കഥ വേണം—അതാ​യ​തു്, സം​ഭ​വ​ബാ​ഹു​ല്യം, ചല​നാ​ത്മ​ക​ത്വം, അപ്ര​തീ​ക്ഷി​ത​മായ ഗതി, പര​മ​മു​ഹൂർ​ത്തം മു​ത​ലാ​യ​വ​കൂ​ടി ഉണ്ടാ​യി​രി​ക്ക​ണം —എന്നു​ള്ള പക്ഷ​ക്കാ​രെ സാ​ധാ​ര​ണ​ക്കാ​രായ വാ​യ​ന​ക്കാ​രു​ടെ ഇട​യ്ക്കു മാ​ത്ര​മ​ല്ല, നല്ല സാ​ഹി​ത്യ​നി​രൂ​പ​ക​രായ ചി​ല​രു​ടെ ഇട​യ്ക്കു​കൂ​ടി ഈ 20-ാം ശതാ​ബ്ദ​ത്തി​ലും കാ​ണാ​വു​ന്ന​താ​ണു്. ഹ്യൂ വാൽ​പോൾ, ഡെ​സ്മ​ണ്ഡ് മക്കാർ​ത്തി എന്നീ നി​രൂ​പ​ക​രെ ഇവർ​ക്കു് ഉദാ​ഹ​ര​ണ​ങ്ങ​ളാ​യി പറയാം. ഈ മട്ടി​ലാ​യി​രു​ന്നു ആദ്യം ഇം​ഗ്ലീ​ഷ് ചെ​റു​ക​ഥ​ക​ളും, ഭാ​ഷാ​ചെ​റു​ക​ഥ​ക​ളും രചി​ക്ക​പ്പെ​ട്ടി​രു​ന്ന​തു്. ഇം​ഗ്ല​ണ്ടിൽ ഇതി​ന്റെ ഫല​മാ​യി സം​സ്കൃ​ത​ചി​ത്ത​രായ ജന​ങ്ങൾ മി​ക്ക​വാ​റും സമ​യം​കൊ​ല്ലി​ക​ളായ ഇത്ത​രം ചെ​റു​ക​ഥ​ക​ളിൽ താൽ​പ​ര്യം കാ​ണി​ക്കാ​തെ വന്നു. ചെ​റു​ക​ഥാ​സ​മാ​ഹാ​ര​ങ്ങൾ പ്ര​സി​ദ്ധീ​ക​രി​ക്കു​ന്ന​തി​നു് ഇം​ഗ്ല​ണ്ടി​ലെ പു​സ്ത​ക​പ്ര​സാ​ധ​കർ വി​മു​ഖ​രാ​യി ഭവി​ക്കു​ക​യും ചെ​യ്തു. ആദ്യ​ത്തെ യൂ​റോ​പ്യൻ മഹാ​യു​ദ്ധ​ത്തി​നു കുറെ മു​മ്പു​തൊ​ട്ടു കാ​ത​റിൻ മാൻ​സ്ഫീൽ​ഡ് മു​ത​ലാ​യ​വർ മോ​പ്പ​സാ​ങ്ങി ന്റേ​യും ചെ​ക്കോ​വി ന്റേ​യും പി​ടി​യിൽ​പ്പെ​ട്ടു പ്ര​സ്തുത കഥ​യെ​ഴു​ത്തു രീ​തി​യിൽ​നി​ന്നു വി​ഭി​ന്ന​മായ ഒന്നിൽ ചെ​റു​ക​ഥ​യെ​ഴു​ത്തു നട​ത്തി​ത്തു​ട​ങ്ങി. ഇവ​രു​ടെ രീ​തി​യിൽ പ്ലാ​ട്ടി​നു് ഒട്ടും​ത​ന്നെ പ്രാ​ധാ​ന്യ​മു​ണ്ടാ​യി​രു​ന്നി​ല്ല. വി​കാ​രം, ക്യാ​റ​ക്ടർ, അന്ത​രീ​ക്ഷം എന്നി​വ​യ്ക്കാ​ണു് ഇവർ പ്രാ​മു​ഖ്യം നൽ​കി​യ​തു്. ഇതു​നി​മി​ത്തം ഇം​ഗ്ലീ​ഷ് ചെ​റു​ക​ഥ​ക​ളോ​ടു​ള്ള ജന​പ്രീ​തി വർ​ദ്ധി​ച്ചു​വ​രു​ക​യും, അവ​യു​ടെ കലാ​പ​ര​മായ മേന്മ അധി​ക​മാ​യി ഭവി​ക്കു​ക​യും ചെ​യ്തു. ഭാഷാ ചെ​റു​ക​ഥ​യെ​ഴു​ത്തിൽ ഈ പരി​വർ​ത്ത​നം വരു​ത്തി​യ​വ​രു​ടെ മു​ന്ന​ണി​യിൽ ശ്രീ: തകഴി ശി​വ​ശ​ങ്ക​ര​പി​ള്ള നി​ല്ക്കു​ന്നു.

ഭാ​വാ​ത്മ​ക​ത്വ​പ്ര​ധാ​ന​മായ ഇത്ത​രം ചെ​റു​ക​ഥ​യെ​ഴു​ത്തി​നും ഇം​ഗ്ലീ​ഷ് സാ​ഹി​ത്യ​ലോ​ക​ത്തിൽ കാ​ല​ക്ര​മേണ ഒരു കുറവു വന്നു​തു​ട​ങ്ങി. ചെ​ക്കോ​വി​ന്റേ​യോ, മോ​പ്പ​സാ​ങ്ങി​ന്റേ​യോ, കാ​ത​റീൻ മാൻ​സ്ഫീൽ​ഡി​ന്റേ യോ, ക്യാ​റ​ക്ടർ ബോധമോ, ഐറ​ണി​യോ, ആക്ഷേ​പ​ഹാ​സ​മോ, സാ​ത്വി​ക​ഹാ​സ​മോ (ഹ്യൂ​മർ), ബഹിർ​ദൃ​ഷ്ടി​യോ കൂ​ടാ​തെ നി​സ്സാ​ര​കാ​ര്യ​ങ്ങ​ളു​ടെ അക​ത്തു​ള്ള സത്തു​മാ​ത്രം നു​ണ​ഞ്ഞു​കു​ടി​ക്കു​ന്ന രീതി മാ​ത്ര​മാ​യി ഇതു് ഇം​ഗ്ലീ​ഷ് സാ​ഹി​ത്യ​ത്തി​ലും ഏറ​ക്കു​റെ ഒന്നു​പോ​ലെ അവി​ദ​ഗ്ദ്ധ​രായ ഭൂ​രി​പ​ക്ഷം ചെ​റു​ക​ഥാ​കാ​ര​രു​ടെ കര​ങ്ങ​ളിൽ അവ​ശേ​ഷി​ക്കു​വാൻ തു​ട​ങ്ങി. ഇതി​ന്റെ ഫല​ങ്ങൾ ഇവ​രു​ടെ ഭാ​വ​ന​യു​ടെ നിർ​ജ്ജീ​വ​ത്വ​വും, അദൃ​ഷ്ട​പൂർ​വ്വ​ക​ത്വ​ശൂ​ന്യ​ത​യും, സങ്കു​ചി​ത​വീ​ക്ഷ​ണ​കോ​ടി​യും, വളർ​ച്ച​യി​ല്ലാ​യ്മ​യു​മാ​ണു്. ശോ​ച​നീ​യ​മായ ഈ സ്ഥി​തി​യിൽ​നി​ന്നു ഭാ​ഷ​യി​ലെ ഭൂ​രി​പ​ക്ഷ​ക്കാ​രായ കാ​ഥി​ക​രും ഉണർ​ന്നെ​ഴു​ന്നേ​ല്ക്കു​ന്ന പൊ​ന്നു​ഷ​സ്സു് പി​ന്നീ​ടു് ആവിർ​ഭ​വി​ച്ചു. ക്യാ​റ​ക്ടർ ബോധം, ആക്ഷേ​പ​ഹാ​സം, സാ​ത്വി​ക​ഹാ​സം, ഐറണി എന്നി​വ​യേ​തെ​ങ്കി​ലും ഒന്നി​നോ​ടു​കൂ​ടി​യു​ള്ള ബഹിർ​ദൃ​ഷ്ടി​യു​ടെ സാ​ന്നി​ധ്യം കാ​ണി​ക്കു​ന്ന കഥകൾ അന​ന്ത​രം ഉണ്ടാ​യി. ഇതു സൂ​ചി​പ്പി​ക്കു​ന്ന വാ​സ​നാ​നു​ഗൃ​ഹി​ത​രായ യു​വ​കാ​ഥി​ക​രാ​ണു് മു​ന്നൊ​രു ലക്ക​ത്തിൽ ഞാൻ നി​രൂ​പ​ണം ചെ​യ്തി​രു​ന്ന ‘തേൻ​മു​ള്ളു​ക​ളു​ടെ’ കർ​ത്താ​വായ ശ്രീ. പി. സി. കു​ട്ടി​കൃ​ഷ്ണ നും, പ്ര​കൃത ചെ​റു​ക​ഥാ​സ​മാ​ഹാ​ര​ത്തി​ന്റെ കർ​ത്താ​വായ ശ്രീ. വള്ള​ത്തോൾ വാ​സു​ദേ​വ​മേ​നോ​നും.

‘പ്ര​ത്യാ​ഗ​മ​നം’, ‘ആണ്ട​റു​തി​യാ​യി​ട്ടു്’, ‘വി​വാ​ഹ​ത്തി​ന്നു​ശേ​ഷം’, ‘ആക്ഷേ​പ​പ്പെ​ട്ടി’, ‘വീ​ട്ടി​ലും പു​റ​ത്തും’, ‘അച്ഛ​നും മകനും’, ‘കാ​ള​വ​ണ്ടി’ എന്നീ ഏഴു പരാ​ജ​യ​പ്ര​സ്ഥാന ചെ​റു​ക​ഥ​ക​ളു​ടെ ഒരു സമാ​ഹാ​ര​മാ​ണു് പ്ര​കൃ​ത​ഗ്ര​ന്ഥം. ഇവയിൽ ‘പ്ര​ത്യാ​ഗ​മ​നം’ എന്ന​തിൽ മാ​ത്രം റൊ​മാ​ന്റി​ക് സാ​ങ്കേ​തി​ക​മാർ​ഗ്ഗ​വും, ശേ​ഷി​ച്ച​വ​യിൽ റീ​യ​ലി​സ്റ്റ് സാ​ങ്കേ​തി​ക​മാർ​ഗ്ഗ​വും പ്ര​യോ​ഗി​ച്ചി​രി​ക്കു​ന്നു. ‘പ്ര​ത്യാ​ഗ​മ​നം’ ‘ആക്ഷേ​പ​പ്പെ​ട്ടി’, ‘അച്ഛ​നും മകനും’, ‘കാ​ള​വ​ണ്ടി’ എന്നിവ ശ്രേ​ഷ്ഠ​ക​ഥ​ക​ളും, ‘ആണ്ട​റു​തി​യാ​യി​ട്ടു്’ ‘വി​വാ​ഹ​ത്തി​നു​ശേ​ഷം’, എന്നീ രണ്ടു നല്ല കഥ​ക​ളും, ശേ​ഷി​ച്ച ‘വീ​ട്ടി​ലും പു​റ​ത്തും’ എന്ന​തു് ഒരു വെറും സാ​ധാ​രണ കഥ​യു​മാ​കു​ന്നു.

‘പ്ര​ത്യാ​ഗ​മ​നം’ എന്ന കഥ​യു​ടെ വിഷയം ശ്രീ. കു​ട്ടി​കൃ​ഷ്ണ​ന്റെ ‘തേ​ന്മു​ള്ളു​ക​ളി​ലെ’ ‘നി​ല​യ്ക്കാ​ത്ത നി​ഷേ​ധം’, ‘അവ​ളു​ടെ ഭർ​ത്തൃ​ദുഃ​ഖം’ എന്നി​വ​യു​ടെ വിഷയം തന്നെ—അതാ​യ​തു്, ഇവി​ട​ത്തെ ബൂർ​ഷ്വാ​ക്ക​ളിൽ പല​രു​ടേ​യും ഇണ​ജീ​വി​ത​ത്തി​നു​ള്ള കൊ​ള്ള​രു​താ​യ്മ. പക്ഷേ, കു​ട്ടി​കൃ​ഷ്ണൻ തന്റെ കഥ​ക​ളിൽ ഉഗ്രാ​ക്ഷേ​പ​ഹാ​സ​വു​മാ​ണു് പ്ര​യോ​ഗി​ച്ചി​രി​ക്കു​ന്ന​തു്. അരി​യും തി​ന്നു്, ആശാ​രി​ച്ചി​യേ​യും കു​ടി​ച്ചു എന്നു​ള്ള രീ​തി​യിൽ, കൃ​ഷ്ണ​മേ​നോ​നെ​ക്കൊ​ണ്ടു നാ​ണി​യ​മ്മ​യോ​ടു തന്നെ വി​വാ​ഹം ചെ​യ്യാൻ സമ്മ​ത​മാ​ണോ എന്നു ചോ​ദി​പ്പി​ച്ചി​രി​ക്കു​ന്ന​തു നി​മി​ത്ത​മാ​ണു് പ്ര​കൃ​ത​ഗ്ര​ന്ഥ​കാ​രൻ തന്റെ കഥയെ ഉഗ്ര ആക്ഷേ​പ​ഹാ​സ​മ​യ​മാ​ക്കി​ച്ച​മ​ച്ചി​രി​ക്കു​ന്ന​തു്.

പരി​ത​സ്ഥി​തി​യും സ്വ​ഭാ​വ​വും തമ്മി​ലു​ള്ള പൊ​രു​ത്ത​മി​ല്ലാ​യ്മ​യും, പരി​ത​സ്ഥി​തി​യു​ടെ അവ​സാ​ന​വി​ജ​യ​വും ചി​ത്രീ​ക​രി​ക്കു​ന്ന​വ​യും, ഈ ഗ്ര​ന്ഥ​കാ​ര​ന്റെ സകല കഥ​ക​ളി​ലും വിവിധ അള​വു​ക​ളിൽ കാ​ണാ​വു​ന്ന ക്യാ​റ​ക്ടർ​ബോ​ധം പ്ര​സ്പ​ഷ്ട​മാ​ക്കു​ന്ന​വ​യു​മായ രണ്ടു കഥ​ക​ളാ​ണു് ‘ആണ്ട​റു​തി​യാ​യി​ട്ടു്’, ‘വി​വാ​ഹ​ത്തി​ന്നു​ശേ​ഷം’ എന്നിവ. ‘തേ​ന്മു​ള്ളു​ക​ളി​ലെ’ ‘ചി​ത്ര​കാ​രൻ’ എന്ന കഥ​യു​ടേ​യും ‘വി​വാ​ഹ​ത്തി​ന്നു​ശേ​ഷം’ എന്ന​തി​ന്റേ​യും വിഷയം ഒന്നു​ത​ന്നെ. ശ്രീ. കു​ട്ടി​കൃ​ഷ്ണ​ന്റേ​തിൽ ലഘു ആക്ഷേ​പ​ഹാ​സ​വും, ശ്രീ. മേ​നോ​ന്റേ​തിൽ ലഘു​സാ​ത്വി​ക​ഹാ​സ​വും കാണാം.

‘ആക്ഷേ​പ​പ്പെ​ട്ടി’ ‘അച്ഛ​നും മകനും’ എന്നീ കഥ​ക​ളിൽ ഇന്ന​ത്തെ ഭാഷാ ചെ​റു​ക​ഥാ​കാ​ര​രിൽ വളരെ അപൂർ​വ്വ​മാ​യി മാ​ത്രം കാ​ണു​ന്ന യഥാർ​ത്ഥ​മായ സാ​ത്വി​ക​ഹാ​സം (ഹ്യൂ​മർ) കാ​ണാ​വു​ന്ന​താ​ണു്. ഉഗ്ര ആക്ഷേ​പ​ഹാ​സ​മോ, ചാ​റ​ത്സ് ഡി​ക്കൻ​സ്, ബ്രെ​റ്റ് ഹാർ​ട്ട് എന്നി​വ​രു​ടെ കഥ​ക​ളിൽ കാ​ണാ​വു​ന്ന താ​ഴ്‌​ന്ന​ത​രം ബഹ​ള​പൂർ​ണ്ണ​മായ സാ​ത്വി​ക​ഹാ​സ​മോ (ഫണ്ണോ) ആണു് ചി​ല​പ്പോൾ ഭാഷാ ചെ​റു​ക​ഥാ​കാ​ര​രിൽ ചിലർ പ്ര​യോ​ഗി​ക്കാ​റു​ള്ള​തു്. ‘ആക്ഷേ​പ​പ്പെ​ട്ടി’ എന്ന കഥ ഈ സമാ​ഹാ​ര​ത്തി​ലെ ഏറ്റ​വും ശ്രേ​ഷ്ഠ​മായ കഥ​യാ​ണെ​ന്നു ഞാൻ വി​ചാ​രി​ക്കു​ന്നു. 20-ാം ശതാ​ബ്ദ​ത്തി​ന്റെ പ്രാ​രം​ഭ​ത്തി​ലെ സാ​ത്വി​ക​ഹാസ ചെ​റു​ക​ഥാ​കാ​ര​രു​ടെ മു​ന്ന​ണി​യിൽ നി​ന്നി​രു​ന്ന ഇം​ഗ്ലീ​ഷു​കാ​രൻ ബാ​രി​പെ​യി​നെ യാണു് ശ്രീ. വാ​സു​ദേ​വ​മേ​നോ​ന്റെ സാ​ത്വി​ക​ഹാ​സ​ക​ഥ​കൾ സാ​മാ​ന്യ​മാ​യി നമ്മെ സ്മ​രി​പ്പി​ക്കു​ന്ന​തു്. സാ​ത്വി​ക​ഹാ​സം എന്താ​ണെ​ന്നു ‘തേ​ന്മു​ള്ളു​കൾ’ നി​രൂ​പ​ണം ചെ​യ്ത​പ്പോൾ ജാർ​ജ്ജ് മെ​റി​ഡി​ത്തി ന്റെ വാ​ക്കു​ക​ളിൽ ഞാൻ ചൂ​ണ്ടി​ക്കാ​ണി​ച്ചി​രു​ന്ന​ല്ലോ. ഒരു യഥാർ​ത്ഥ സാ​ത്വി​ക​ഹാ​സ​കാ​ര​ന്റെ വീ​ക്ഷ​ണ​കോ​ടി വി​ശ​ദീ​ക​രി​ക്കു​വാ​നാ​യി ഒരു സാ​ത്വിക ഹാസ ഉപ​ന്യാ​സ​കാ​ര​നാ​യി​രു​ന്ന 19-ാം ശതാ​ബ്ദ​ത്തി​ലെ സു​പ്ര​സി​ദ്ധ ഇം​ഗ്ലീ​ഷു​കാ​രൻ ചാ​റ​ത്സ്ലാം​ബി നെ​പ്പ​റ്റി വാൾ​ട്ടർ പേ​റ്റർ എന്ന നി​രൂ​പ​ക​കേ​സ​രി പറ​ഞ്ഞി​ട്ടു​ള്ള​തു ചുവടെ ചേർ​ക്കു​ന്നു:

“ഹോ​ഗാർ​ത്തി ന്റെ (18-ാം ശതാ​ബ്ദ​ത്തി​ലെ ഒരു ഇം​ഗ്ലീ​ഷു​കാ​രൻ ചി​ത്ര​കാ​രൻ) ‘വി​ട​ന്റെ പോ​ക്കു്’, ‘പരി​ഷ്ക്കാ​ര​മ​ട്ടി​ലു​ള്ള വി​വാ​ഹം’, എന്നീ ചി​ത്ര​ങ്ങ​ളിൽ വളരെ സു​വ്യ​ക്ത​മാ​യി ചി​ത്രീ​ക​രി​ച്ചി​രി​ക്കു​ന്ന പഴയ രീ​തി​യി​ലു​ള്ള ജീ​വി​ത​ത്തി​ന്റേ​യും, പഴയ ഭവ​ന​ങ്ങ​ളു​ടേ​യും, പഴയ മട്ടി​ലു​ള്ള വസ്ത്ര​ങ്ങ​ളു​ടേ​യും, അവ​ശി​ഷ്ട​ങ്ങ​ളും, പഴയ ആചാ​ര​ങ്ങ​ളും പെ​രു​മാ​റ്റ​ങ്ങ​ളും, നമ്മു​ടെ ഇന്ന​ത്തെ രീ​തി​ക​ളോ​ടു താ​ര​ത​മ്യ​പ്പെ​ടു​ത്തി നോ​ക്കു​മ്പോൾ, അവ എത്ര​യ​ധി​കം സാ​ധാ​ര​ണ​ങ്ങ​ളും, മു​ഷി​പ്പി​ക്കു​ന്ന​വ​യും, ഇതോ​ടു​കൂ​ടി​ത്ത​ന്നെ അവ​യു​ടെ ചി​ത്രോ​പ​മ​മായ സ്വാ​ഭാ​വ​ത്തി​ന്റെ ബോ​ധ​വും നമ്മിൽ ജനി​ക്കാ​തെ​യി​രി​ക്കു​ന്നി​ല്ല. സ്വാ​ഭാ​വി​ക​മ​ല്ലെ​ന്നു നമു​ക്കു തോ​ന്നു​ന്ന ആചാ​ര​ങ്ങൾ, ഇത്ത​രം വസ്ത്ര​ങ്ങൾ, ഇത്ത​രം സാ​മാ​ന​ങ്ങൾ—വച്ചു പരി​പാ​ലി​ച്ചു കൊ​ണ്ടു​പോ​ക​ണ​മെ​ന്നു​ള്ള വി​ചാ​രം കൂ​ടാ​തെ ആക​സ്മി​ക​മാ​യി അവ​ശേ​ഷി​ക്കു​ന്ന പഴയ ഫാ​ഷ​ന്റെ മാ​തൃ​ക​കൾ—എന്നി​വ​യെ, ഇവ കാ​ല​ത്തി​ന്റെ യഥാർ​ത്ഥ​സ്വ​രം ഉൾ​ക്കൊ​ള്ളു​ന്ന​തി​നാൽ, കൂ​ടു​തൽ സം​സ്ക്കാ​രാ​ത്മ​ക​വും ആത്മ​ബോ​ധ​പ​ര​വു​മായ അവ​ശി​ഷ്ട​ങ്ങൾ​ക്കു സ്ഥാ​ന​ഭ്രം​ശം വരു​ത്തു​വാൻ പ്രാ​യേണ അസാ​ധ്യ​മാ​ണെ​ന്നു​ള്ള വീ​ക്ഷ​ണ​കോ​ടി​യി​ലൂ​ടെ നാം സൗ​ശീ​ല്യ​ത്തെ അതി​ക്ര​മി​ച്ച ഒരു മനോ​ഭാ​വ​സ​ഹി​തം നി​രീ​ക്ഷി​ക്കാ​റു​ണ്ടു്. ജീ​വ​പ്ര​കാ​ശ​ന​ങ്ങ​ളു​ടെ രഹ​സ്യം നമു​ക്കു നല്കു​ന്ന​തി​നാൽ, നാം സഹി​ഷ്ണു​താ​പൂർ​വ്വം നി​രീ​ക്ഷി​ക്കു​ന്ന വ്യ​ക്തി​ചേ​ഷ്ട​ക​ളെ​പ്പോ​ലെ​യാ​ണു് ഇവ. ഇത്ത​രം കാ​ര്യ​ങ്ങ​ളിൽ നാം എല്ലാ​വ​രും​ത​ന്നെ കു​റെ​യൊ​ക്കെ സാ​ത്വി​ക​ഹാ​സ​കാ​ര​രാ​യി ഭവി​ക്കു​ന്നു. സമ​കാ​ലീ​ന​കാ​ര്യ​ങ്ങ​ളിൽ ഈ ചി​ന്താ​പ​ര​മായ ഭാവം പൂ​ണു​ക​യാ​ണു് ഒരു യഥാർ​ത്ഥ സാ​ത്വി​ക​ഹാ​സ​സാ​ഹി​ത്യ​കാ​രൻ ചെ​യ്യു​ന്ന​തു്. പഴയ കാ​ര്യ​ങ്ങൾ അവ​യു​ടെ ബാ​ഹ്യ​വേ​ഷം നി​മി​ത്തം മാ​ത്രം അവ​ശേ​ഷി​ക്കു​മ്പോൾ, പി​ല്ക്കാ​ല​ത​ല​മു​റ​ക​ളി​ലെ മനു​ഷ്യർ അവയെ മു​ക​ളിൽ പ്ര​സ്താ​വി​ച്ച സം​സ്കൃ​ത​വും ശു​ദ്ധി​കൃ​ത​വു​മായ വീ​ക്ഷ​ണ​കോ​ടി​യി​ലൂ​ടെ സ്വാ​ഭാ​വി​ക​മാ​യി വീ​ക്ഷി​ക്കാ​റു​ള്ള​തു​പോ​ലെ, ഒരു യഥാർ​ത്ഥ​സാ​ത്വി​ക​ഹാ​സ​സാ​ഹി​ത്യ​കാ​രൻ കാ​ര്യ​ങ്ങ​ളെ ദർ​ശി​ക്കു​ന്നു. മനു​ഷ്യ​വർ​ഗ്ഗ​ത്തി​ന്റെ പ്ര​വർ​ത്ത​ന​ങ്ങ​ളെ ആക​മാ​നം സാ​ധാ​രണ മനു​ഷ്യർ​ക്കു സാ​ധ്യ​മ​ല്ലാ​ത്ത രീ​തി​യി​ലു​ള്ള വി​ശാ​ല​മായ ഗ്ര​ഹ​ണ​ശ​ക്തി​പൂർ​വ്വം ദർ​ശി​ക്കു​ക​യും, ഒരു മട്ടി​നെ​യോ, ബാ​ഹ്യ​സ്വ​ഭാ​വ​ത്തേ​യോ, ഫാ​ഷ​നേ​യോ, അതിനെ ജനി​പ്പി​ച്ചു ആദ്ധ്യാ​ത്മി​ക​പ​രി​ത​സ്ഥി​തി​യോ​ടു ഘടി​പ്പി​ച്ചു സദാ നി​രീ​ക്ഷി​ക്കു​ക​യും ചെ​യ്യു​മ്പോൾ, ചാ​റ​ത്സ്ലാം​ബി​നെ​പ്പോ​ലെ​യു​ള്ള ഒരു സാ​ത്വി​ക​ഹാ​സ​സാ​ഹി​ത്യ​കാ​രൻ കാ​ല​ത്തി​ന്റെ വി​ദൂ​ര​ത​യു​ടെ ഇന്ദ്ര​ജാ​ല​ത്തെ പൂർ​വ്വാ​സ്വാ​ദ​നം ചെ​യ്യു​ന്ന​തു്. സ്ഥലം, ശ്രേ​ണി, ജീ​വി​ത​ശീ​ല​ങ്ങൾ, എന്നി​വ​യു​ടെ സ്വ​ഭാ​വ​ഘ​ട​ക​ങ്ങൾ അദ്ദേ​ഹ​ത്തെ സം​ബ​ന്ധി​ച്ചി​ട​ത്തോ​ളം ഇപ്പോൾ​ത്ത​ന്നെ, കാ​ല​ത്തി​നു​മു​മ്പാ​യി കാ​വ്യാ​ത്മ​ക​മായ പ്ര​കാ​ശ​ത്താൽ രൂ​പാ​ന്ത​ര​പ്പെ​ട്ടി​രി​ക്കു​ന്നു.”

പേ​റ്റർ ഭം​ഗി​യാ​യി വി​വ​രി​ച്ചി​ട്ടു​ള്ള ഒരു യഥാർ​ത്ഥ സാ​ത്വിക ഹാ​സ​സാ​ഹി​ത്യ​കാ​ര​ന്റെ ദർ​ശ​ന​കോ​ടി​യാ​ണു് ശ്രീ. വാ​സു​ദേ​വ​മേ​നോൻ തന്റെ സാ​ത്വിക ഹാ​സ​ക​ഥ​ക​ളി​ലും പ്ര​ദർ​ശി​പ്പി​ച്ചി​രി​ക്കു​ന്ന​തു്. ‘ആക്ഷേ​പ​പ്പെ​ട്ടി’ ചീ​ന​രു​ടെ സാ​ത്വി​ക​ഹാ​സ​ത്തെ അധി​ക​മാ​യി നമ്മെ സ്മ​രി​പ്പി​ക്കു​ന്നു, ‘എന്റെ നാടും എന്റെ നാ​ട്ടു​കാ​രും’ എന്ന തന്റെ പ്ര​സി​ദ്ധ കൃ​തി​യിൽ ലിൻ​യു​ടാ​ങ്ങ് എന്ന ചീന സാ​ഹി​ത്യ​കാ​രൻ ഇതിനെ ഇങ്ങ​നെ വി​വ​രി​ച്ചി​രി​ക്കു​ന്നു: “ചീ​ന​രു​ടെ ശവ​സം​സ്ക്കാര ഘോ​ഷ​യാ​ത്ര​ക​ളി​ലു​ള്ള പ്ര​ഹ​സ​ന​ഘ​ട​കം മാ​തൃ​കാ​പ​ര​മാ​ണു്. ഉയർ​ന്ന തര​ക്കാ​രും ഇട​ത്ത​ര​ക്കാ​രു​മായ ഇന്ന​ത്തെ ചീ​ന​രു​ടെ ആഡം​ബ​ര​ബ​ഹു​ല​ങ്ങ​ളായ ശവ​സം​സ്ക്കാ​ര​ഘോ​ഷ​യാ​ത്ര​ക​ളിൽ, ‘മു​മ്പോ​ട്ടു്, ഓ, ക്രി​സ്ത്യൻ ഭട​ന്മാ​രെ!’ എന്നു വാ​യി​ക്കു​ന്ന ബാൻ​ഡു​വാ​ദ്യ​മേ​ള​ത്തോ​ടു​കൂ​ടി കസ​വു​വ​ച്ച വി​വി​ധ​വർ​ണ്ണ​ങ്ങ​ളോ​ടു​കൂ​ടിയ ഗൗ​ണു​ക​ളും ധരി​ച്ചു പോ​കു​ന്ന വൃ​ത്തി​കെ​ട്ട അങ്ങാ​ടി​പ്പി​ള്ള​രെ​യും കാണാം. ചീ​ന​രു​ടെ സാ​ത്വി​ക​ഹാ​സ​രാ​ഹി​ത്യ​ത്തി​ന്നു തെ​ളി​വാ​യി ഇതിനെ യൂ​റോ​പ്യ​ന്മാർ പല​പ്പോ​ഴും ഉദ്ധ​രി​ക്കാ​റു​ണ്ടു്. ചീ​ന​രു​ടെ ഒരു ശവ​സം​സ്ക്കാ​ര​ഘോ​ഷ​യാ​ത്ര വാ​സ്ത​വ​ത്തിൽ അവ​രു​ടെ സാ​ത്വി​ക​ഹാ​സ​സാ​ഹി​ത്യ​ത്തി​ന്റെ ഒരു ഉത്തമ സിം​ബ​ളാ​ണു്. യൂ​റോ​പ്യ​ന്മാർ മാ​ത്ര​മേ ഒരു ശവ​സം​സ്ക്കാ​ര​ഘോ​ഷ​യാ​ത്ര​യെ ഗൗ​ര​വ​ഭാ​വ​പൂർ​വ്വം പരി​ഗ​ണി​ച്ചു് അതിനെ ഗം​ഭീ​ര​മാ​ക്കി​ച്ച​മ​യ്ക്കു​ക​യു​ള്ളൂ. ഗൗ​ര​വ​മായ ഒരു ശവ​സം​സ്ക്കാ​ര​ഘോ​ഷ​യാ​ത്ര​യെ​പ്പ​റ്റി ഒരു ചീനനു വി​ചാ​രി​ക്കു​വാൻ​പോ​ലും സാ​ധി​ക്കു​ന്ന​ത​ല്ല… ഇത്ത​രം ഒരു ഘോ​ഷ​യാ​ത്ര തു​ല്യം ബഹ​ള​പൂർ​ണ്ണ​വും അധി​ക​മായ പണ​ചെ​ല​വു​ക​ളു​ള്ള​തു​മാ​യി​രി​ക്ക​ണ​മെ​ന്ന​തും, അതു ഗൗ​ര​വ​ത​ര​മാ​യി​രി​ക്കേ​ണ്ട​തി​ല്ലെ​ന്നു​മാ​ണു് ചീനർ വി​ചാ​രി​ക്കു​ന്ന​തു്. ഗൗ​ര​വ​ത​ര​മെ​ന്ന ഘടകം പ്ര​സ്തുത ആഡം​ബ​ര​മേ​റിയ ഗൗ​ണു​ക​ളിൽ മാ​ത്രം അട​ങ്ങി​യി​രു​ന്നാൽ മതി. ശേ​ഷി​ച്ച​തെ​ല്ലാം ബാ​ഹ്യാ​ചാ​ര​വും പ്ര​ഹ​സ​ന​വു​മാ​ണു്… ഇപ്ര​കാ​രം പ്ര​ഹ​സ​നാ​ത്മ​ക​ങ്ങ​ളായ ശവ​സം​സ്ക്കാ​ര​ഘോ​ഷ​യാ​ത്ര​കൾ സിം​ബ​ളൈ​സ് ചെ​യ്യു​ന്ന​തു​പോ​ലെ, ചീ​ന​രു​ടെ സാ​ത്വി​ക​ഹാ​സം കാ​ര്യ​ങ്ങ​ളു​ടെ ബാ​ഹ്യ​രൂ​പ​ത്തോ​ടു​ള്ള ആദ​ര​വി​ലും, അവ​യു​ടെ ആന്ത​രി​ക​മായ തത്വ​ത്തി​ന്റെ വി​ഗ​ണി​ക്ക​ലി​ലു​മാ​ണു് സ്ഥി​തി​ചെ​യ്യു​ന്ന​തു്.”

പരി​ത​സ്ഥി​തി​യും സ്വ​ഭാ​വ​വും തമ്മി​ലു​ള്ള പൊ​രു​ത്ത​മി​ല്ലാ​യ്മ​യെ സാ​ത്വി​ക​ഹാ​സ​പൂർ​വ്വം വർ​ണ്ണി​ച്ചി​ട്ടു​ള്ള ഒരു കഥ​യാ​ണു് ‘അച്ഛ​നും മകനും’ എന്ന​തു്, ‘കാ​ള​വ​ണ്ടി’ എന്ന ഒടു​വി​ല​ത്തെ കഥയിൽ ഐറ​ണി​യു​ടെ പ്ര​യോ​ഗം കാണാം. നാ​ട്ടി​ലെ ഗണി​ക​യായ ‘ദമ​യ​ന്തി’ ആയി​ക്കൊ​ള്ളൂ എന്നു പറ​ഞ്ഞു ആക്ഷേ​പി​ക്കു​ന്ന അവ​ളു​ടെ തള്ള ആ ‘ദമ​യ​ന്തി’യുടെ കാ​മു​ക​രിൽ ഒരു​ത്ത​നായ കണാ​ര​നോ​ടു മകളെ ‘കൂ​ട്ടി​വി​ടു​ന്ന’തി​ലാ​ണു് ഈ കഥ​യി​ലെ ഐറണി സ്ഥി​തി​ചെ​യ്യു​ന്ന​തു്. കോൺ​സെൻ​ട്രേ​ഷൻ, പ്ര​കൃ​തി​ലാ​വ​ണ്യ​ബോ​ധം എന്നീ ഘട​ക​ങ്ങ​ളും വാ​സു​ദേ​വ​മേ​നോ​ന്റെ കഥ​യെ​ഴു​ത്തിൽ കാണാം. പ്ര​സ​ന്ന​മാ​ണു് ഇദ്ദേ​ഹ​ത്തി​ന്റെ ഭാ​ഷാ​രീ​തി.

ഗ്ര​ന്ഥ​കർ​ത്താ: വള്ള​ത്തോൾ വാ​സു​ദേ​വ​മേ​നോൻ

(വള്ള​ത്തോൾ വാ​സു​ദേ​വ​മേ​നോ​ന്റെ ചെ​റു​ക​ഥ​യ്ക്കു് കേസരി ബാ​ല​കൃ​ഷ്ണ​പി​ള്ള എഴു​തിയ നി​രൂ​പ​ണം.)

കേ​സ​രി​യു​ടെ ലഘു​ജീ​വ​ച​രി​ത്രം