“ഒരു ശത്രു​വി​നെ നേ​ടു​ന്ന​തി​നു് ഒരാൾ​ക്കു് ഒരു വ്യ​ക്തി​മു​ദ്ര (പേർ​സ​ണാ​ലി​റ്റി) ഉണ്ടാ​യി​രു​ന്നേ മതി​യാ​വൂ. ഒരു സ്നേ​ഹി​ത​നെ ലഭി​ക്കു​വാൻ സാ​ധാ​ര​ണ​മാ​യി ഒരു കേ​ക്കു​ണ്ടാ​ക്കു​ന്ന​തി​നു വേ​ണ്ടി​വ​രു​ന്ന സാ​മ​ഗ്രി​കൾ—ധാ​രാ​ളം വെ​ണ്ണ​യും പഞ്ച​സാ​ര​യും—മാ​ത്രം മതി.” എന്നു ലേഡി ഏ. ഫോർ​ബ്സ് പ്ര​സ്താ​വി​ച്ചി​ട്ടു​ണ്ടു്. ശ്രീ: തകഴി ശി​വ​ശ​ങ്ക​ര​പി​ള്ള യിൽ പ്ര​സ്തുത വ്യ​ക്തി​മു​ദ്ര പൊ​ന്തി​ച്ചു​നിൽ​ക്കു​ന്ന​തു നി​മി​ത്ത​മാ​ണു് അദ്ദേ​ഹം ഇന്ന​ത്തെ ഭാ​ഷാ​സാ​ഹി​ത്യ​കാ​ര​ന്മാ​രിൽ​വെ​ച്ചു് ഏറ്റ​വും അധി​ക്ഷി​പ്ത​നാ​യി ഭവി​ച്ചി​രി​ക്കു​ന്ന​തും. ഇന്ന​ത്തെ സാ​ഹി​ത്യ​കാ​ര​ന്മാർ വാ​യ​ന​ക്കാ​ര​നു് ഒരു ചവി​ട്ടു കൊ​ടു​ത്തു് അയാളെ തന്റെ കൃ​തി​യി​ലേ​യ്ക്കു് ആകർ​ഷി​ച്ചു​വ​രു​ന്നു എന്നു പാ​ശ്ചാ​ത്യ​നി​രൂ​പ​കർ പറ​യാ​റു​ള്ള​തു് തക​ഴി​ക്കും ചേ​രു​ന്ന​താ​ണു്. ഇതിനു കാരണം ഇത്ത​രം ഒരു സാ​ഹി​ത്യ​കാ​ര​നായ ബെർ​ണാ​ഡ്ഷാ ഇങ്ങ​നെ പറ​ഞ്ഞി​രി​ക്കു​ന്നു: “ഈ ലോ​ക​ത്തിൽ നി​ങ്ങൾ ഒരു കാ​ര്യം കോ​പ​പ്പെ​ടു​ത്തു​ന്ന​വി​ധം പറ​ഞ്ഞി​ല്ലെ​ങ്കിൽ, അതു് പറ​യാ​തെ​യി​രി​ക്കു​ന്ന​താ​ണു് നല്ല​തു്; എന്തു​കൊ​ണ്ടെ​ന്നാൽ, തങ്ങ​ളെ ശല്യ​പ്പെ​ടു​ത്തു​ന്ന ഒന്നി​ല​ല്ലാ​തെ മറ്റൊ​ന്നി​ലും ലോകർ ശ്ര​ദ്ധ​പ്പ​തി​പ്പി​ക്കു​ന്ന​ത​ല്ല.”

എന്താ​ണു് തകഴി കേ​ര​ളീ​യ​രെ ശല്യ​പ്പെ​ടു​ത്തി ധരി​പ്പി​ച്ചു​വ​രു​ന്ന​തു്? അവ​രു​ടെ ലൈം​ഗി​ക​ജീ​വി​ത​ത്തി​ലെ കാ​പ​ട്യം, പര​സ്പ​ര​വൈ​രു​ദ്ധ്യം, അതി​ന്റെ ജീർ​ണ്ണി​പ്പു്. ചി​ന്തി​പ്പി​ക്കു​വാൻ മാ​ത്ര​മാ​യി തകഴി വർ​ണ്ണി​ക്കാ​റു​ള്ള ദു​ഷി​ച്ച ലൈം​ഗി​ക​ജീ​വി​ത​ക​ഥ​ക​ളേ​ക്കാൾ വള​രെ​യ​ധി​കം വഷ​ളാ​യവ കേ​ട്ടു രസി​ക്കു​വാൻ മദ്ധ്യ​കാ​ല​ങ്ങ​ളി​ലെ കേ​ര​ളീ​യർ​ക്കു​ണ്ടാ​യി​രു​ന്ന വാസന ഈയിടെ കോ​ട്ട​യ​ത്തു​വെ​ച്ചു നടന്ന അഖി​ല​കേ​രള പു​രോ​ഗ​മ​ന​സാ​ഹി​ത്യ​കാ​ര​സ​മ്മേ​ള​ന​ത്തി​ലെ ഒരു അദ്ധ്യ​ക്ഷ​പ്ര​സം​ഗ​ത്തിൽ ശ്രീ: ചങ്ങ​മ്പുഴ ‘ചന്ദ്രോ​ത്സവ’ത്തി​ലെ ഒരു ശ്ലോ​കം ഉദ്ധ​രി​ച്ചു ചൂ​ണ്ടി​ക്കാ​ണി​ച്ചി​രു​ന്നു. ലോ​ക​രു​ടെ കണ്ണിൽ മണ്ണി​ടാ​നാ​യി പുറമേ എന്തു വേ​ദാ​ന്തം പു​ല​മ്പി​യാ​ലും ശരി, ഈ വാസന അവരിൽ ഇന്നും നി​ല​നി​ന്നു​വ​രു​ന്നു എന്നു​ള്ള​തു തക​ഴി​യു​ടെ ചെ​റു​ക​ഥ​ക​ളു​ടെ വി​റ്റ​ഴി​വി​ന്റെ ഭീ​മ​ത്വം സ്ഥാ​പി​ക്കു​ന്നു​ണ്ടു്. ഇതി​ലാ​ണു് ഇവ​രു​ടെ— അഭ്യ​സ്ത​വി​ദ്യ​രായ കേ​ര​ളീ​യ​രു​ടെ—കാ​പ​ട്യം സ്ഥി​തി​ചെ​യ്യു​ന്ന​തു്. ഇവർ ഏതി​ലും തങ്ങൾ ഉദ്ദേ​ശി​ക്കു​ന്ന​തു ചെ​യ്യു​ന്ന​വ​രും പറ​യു​ന്ന​തു് ഉദ്ദേ​ശി​ക്കാ​ത്ത​വ​രു​മാ​ണു​താ​നും.

ഭാ​ഷാ​സാ​ഹി​ത്യ​ത്തി​ലെ പരാജയ (റി​യ​ലി​സ്റ്റ്) പ്ര​സ്ഥാ​ന​ത്തിൽ​പ്പെ​ട്ട ചെ​റു​ക​ഥ​യെ​ഴു​ത്തി​ന്റെ സ്ഥാ​പ​ക​നായ ഒരു മഹാ​ക​വി​യാ​ണു് തകഴി എന്നു ഞാൻ ‘മണി​നാ​ദം’, ‘കട​ത്തു​വ​ഞ്ചി’ എന്നി​വ​യു​ടെ അവ​താ​രി​ക​ക​ളിൽ ചൂ​ണ്ടി​ക്കാ​ണി​ച്ചി​രു​ന്നു. ‘പര​മാർ​ത്ഥ​ങ്ങൾ’ എന്ന പ്ര​കൃ​ത​മ​നഃ​ശ്ശാ​സ്ത്ര​നോ​വ​ലെ​ഴു​ത്തെ​ന്ന രൂ​പ​സം​ബ​ന്ധ​മായ ഉപ​പ്ര​സ്ഥാ​ന​ത്തി​ന്റെ സ്ഥാ​പ​ക​നാ​യി ഭവി​ക്കു​ക​യും ചെ​യ്തി​രി​ക്കു​ന്നു. പരാ​ജ​യ​പ്ര​സ്ഥാ​ന​നോ​വ​ലു​ക​ളെ, ഫ്ര​ഞ്ച് നി​രൂ​പ​ണ​പ​ദ്ധ​തി​യ​നു​സ​രി​ച്ചു്, നാ​ച്ചു​റ​ലി​സ്റ്റ്, അഥവാ, റി​യ​ലി​സ്റ്റ് നോ​വ​ലു​ക​ളെ​ന്നും, മനഃ​ശ്ശാ​സ്ത്ര​നോ​വ​ലു​ക​ളെ​ന്നും രണ്ടു​ത​ര​മാ​യി വി​ഭ​ജി​ക്കാം. മോ​പ്പ​സ​ങ്ങി ന്റെ ‘കാ​മു​കൻ’ ടോൾ​സ്റ്റോ​യി യുടെ ‘അന്ന​ക​രേ​നിന’, സോള യുടെ ‘നാന’ എന്നിവ നാ​ച്ചു​റ​ലി​സ്റ്റ് നോ​വ​ലു​ക​ളും, സ്റ്റെൻ​ഡ​ലി ന്റെ ‘ചെ​മ​പ്പും കറു​പ്പും’, ഡാ​സ്റ്റോ​വ്സ്കി യുടെ ‘കു​റ്റ​വും ശി​ക്ഷ​യും’, പാൾ​ബൂർ​ഷേ യുടെ ‘ക്രൂ​ര​മായ പ്ര​ശ്നം’ എന്നിവ മനഃ​ശ്ശാ​സ്ത്ര​നോ​വ​ലു​ക​ളു​മാ​ണു്. തക​ഴി​യു​ടെ ചെ​റു​ക​ഥ​കൾ നാ​ച്ചു​റ​ലി​സ്റ്റ് ചെ​റു​ക​ഥ​യെ​ഴു​ത്തിൽ പെടും.

‘പര​മാർ​ത്ഥ​ങ്ങ​ളി’ലെ പ്ലാ​ട്ടി​ന്റെ (ഇതി​വൃ​ത്ത​ത്തി​ന്റെ) ചില ഘട​ക​ങ്ങൾ ഹാർഡി യുടെ ‘ടെ​സ്സ് ’ എന്ന നോവൽ, സ്ട്രിൻ​ഡ്ബർ​ഗ്ഗി ന്റെ ‘മി​സ്സ് ജൂലിയ’ എന്ന ഗദ്യ​നാ​ട​കം, മോ​പ്പ​സ​ങ്ങി​ന്റെ ‘നി​ഷ്പ്ര​യോ​ജ​ന​മായ സൗ​ന്ദ​ര്യം’ എന്ന ചെ​റു​കഥ എന്നി​വ​യിൽ കാണാം. ഇവയെ ഭേ​ദ​പ്പെ​ടു​ത്തി സ്വ​ന്തം ഘട​ക​ങ്ങ​ളോ​ടു തകഴി കൂ​ട്ടി​ച്ചേർ​ത്തി​രി​ക്കു​ന്നു. മു​ഴു​വ​നും അചി​ന്തി​ത​പൂർ​വ്വ​ക​ങ്ങ​ളായ പ്ലാ​ട്ടു​കൾ വി​ശ്വ​സാ​ഹി​ത്യ​ത്തി​ലെ നോ​വ​ലു​ക​ളിൽ അപൂർ​വ്വ​മാ​യി മാ​ത്ര​മേ കാ​ണാ​റു​ള്ളൂ. ഭർ​ത്താ​വി​ല്ലാ​തെ ഗർഭം ധരി​ക്കു​ന്ന ഒരു കന്യ​ക​യ്ക്കു സമു​ദാ​യം വി​ധി​ച്ചി​ട്ടു​ള്ള പതി​ത​ത്വം നി​മി​ത്തം, അവൾ ഗർ​ഭി​ണി​യാ​യി​രി​ക്കു​മ്പോൾ​ത​ന്നെ ഇരു​വ​ശ​ത്തും പ്ര​ണ​യ​ര​ഹി​ത​വും, ഒരു കരാ​റിൽ അധി​ഷ്ഠി​ത​വു​മായ ഒരു വി​വാ​ഹ​ബ​ന്ധ​ത്തിൽ​പ്പെ​ടു​ന്ന​തും, ഇതി​ന്റെ ഭയ​ങ്ക​ര​ഫ​ല​ങ്ങ​ളു​മാ​ണു് പ്ര​കൃ​ത​ചെ​റു​നോ​വ​ലി​ന്റെ കഥാ​ബീ​ജം. ഇത്ത​രം ഒരു വി​വാ​ഹ​വും കരാ​റും അസാ​ധാ​ര​ണ​മാ​ണെ​ങ്കി​ലും അസം​ഭ​വ്യ​മ​ല്ല. കഥാ​നാ​യി​ക​യായ പ്ര​സ്തുത യുവതി ജാ​ന​കി​യ​മ്മ​യെ വി​വാ​ഹം ചെ​യ്യാൻ പത്മ​നാ​ഭ​പി​ള്ള​യെ പ്രേ​രി​പ്പി​ച്ച മു​ഖ്യ​സം​ഗ​തി അവ​ളു​ടെ അസാ​ധാ​ര​ണ​മായ സൗ​ന്ദ​ര്യ​മാ​ണു്. ഇതി​നു​ള്ള ശേ​ഷി​ച്ച കാ​ര​ണ​ങ്ങൾ അവൾ തന്നെ തനി​ക്കു പത്മ​നാ​ഭ​പി​ള്ള​യിൽ ജനി​ച്ച പു​ത്ര​നായ ഗോ​പ​കു​മാ​ര​നെ ഇങ്ങ​നെ പറ​ഞ്ഞു കേൾ​പ്പി​ക്കു​ന്നു: “എന്നെ സ്വീ​ക​രി​ച്ച​തു് ആർ​ദ്ര​ത​കൊ​ണ്ട​ല്ല. അതു് എന്റെ അധഃ​പ​തി​ച്ച നി​ല​യിൽ​നി​ന്നു മു​ത​ലെ​ടു​ക്കാ​മെ​ന്നു​വെ​ച്ചാ​ണു്. അതു ഹൃ​ദ​യ​ശൂ​ന്യ​ത​യാ​ണു്. പതി​ത​യായ പെ​ണ്ണു ഭാ​ര്യ​യാ​യാൽ എന്തും സഹി​ക്കു​മെ​ന്നു​വെ​ച്ചു്, മറ്റേ​തൊ​രു​വ​ളെ സ്വീ​ക​രി​ച്ചാ​ലും അവൾ പറ​യു​ന്ന​തു വി​ശ്വ​സി​ക്കു​ക​യ​ല്ലേ തര​മു​ള്ളൂ?”

തന്റെ ചെ​റു​ക​ഥ​യെ​ഴു​ത്തി​ന്റെ സാ​ങ്കേ​തി​ക​മാർ​ഗ്ഗ​ത്തിൽ വി​ശ്വ​വി​ശ്രുത ചെ​റു​ക​ഥാ​കാ​രായ മോ​പ്പ​സ​ങ്ങി​ന്റേ​യും ചെ​ക്കോ​വി ന്റെ​യും സാ​ങ്കേ​തി​ക​മാർ​ഗ്ഗ​ങ്ങൾ ചേ​രും​വി​ധം കലർ​ത്തിയ ഒന്നാ​ണു് തകഴി സ്വീ​ക​രി​ച്ചി​ട്ടു​ള്ള​തു്. തന്റെ പുതിയ മനഃ​ശ്ശാ​സ്ത്ര​നോ​വ​ലെ​ഴു​ത്തി​ലാ​ക​ട്ടെ, വി​ശ്വ​വി​ശ്രുത മനഃ​ശ്ശാ​സ്ത്ര​നോ​വൽ​കർ​ത്താ​ക്ക​ളായ സ്റ്റെൻ​ഡ​ലി​ന്റേ​യും, ഡാ​സ്റ്റോ​വ്സ്കി​യു​ടേ​യും സാ​ങ്കേ​തിക മാർ​ഗ്ഗ​ങ്ങൾ കലർ​ത്തിയ ഒന്നു് അദ്ദേ​ഹം പ്ര​യോ​ഗി​ച്ചി​രി​ക്കു​ന്നു. കഥ​യു​ടെ പരി​ണാ​മ​ത്തി​നു് അല്പം മു​മ്പു​വെ​ച്ചു നോവൽ തു​ട​ങ്ങുക, അല്പ​കാ​ലം​കൊ​ണ്ടു കഥ അവ​സാ​നി​പ്പി​ക്കുക, സം​ഭാ​ഷ​ണ​ങ്ങൾ​കൊ​ണ്ടും ഇവ​യു​ടെ ചെറിയ വ്യാ​ഖ്യാ​ന​ങ്ങൾ കൊ​ണ്ടും നോവൽ നി​റ​യ്ക്കുക, അതാ​യ​തു, നോ​വ​ലി​നെ അത്യ​ധി​കം നാ​ട​കീ​യ​മാ​ക്കുക, പ്ര​കൃ​തി​വർ​ണ്ണന പ്രാ​യേണ വർ​ജ്ജി​ക്കുക എന്നീ ‘പര​മാർ​ത്ഥ​ങ്ങ​ളി’ലെ സാ​ങ്കേ​തി​ക​മാർ​ഗ്ഗ​ഘ​ട​ക​ങ്ങൾ ഗ്ര​ന്ഥ​കാ​രൻ ഡാ​സ്റ്റോ​വ്സ്കി​യിൽ​നി​ന്നാ​ണു് സ്വീ​ക​രി​ച്ചി​ട്ടു​ള്ള​തു്. ഡാ​സ്റ്റോ​വ്സ്കി​യു​ടെ പ്ര​സി​ദ്ധ​നോ​വ​ലു​ക​ളായ ‘കര​മ​സ്സോ​വ് സഹോ​ദ​രർ’ ‘പി​ശാ​ചു​കൾ’ എന്നി​വ​യി​ലെ ചില സീ​നു​കൾ മോ​സ്കോ​യി​ലെ ആർ​ട്ട് തി​യേ​റ്റർ​കാർ അഭി​ന​യി​ച്ച​പ്പോൾ, അവയിൽ ഒരു അക്ഷ​രം​പോ​ലും മാ​റ്റാ​തെ അവയെ അഭി​ന​യി​ക്കാ​മെ​ന്നു് അവർ മന​സ്സി​ലാ​ക്കി. ഇതു​പോ​ലെ ‘പര​മാർ​ത്ഥ​ങ്ങ​ളെ’ എളു​പ്പം 11 രം​ഗ​ങ്ങ​ളു​ള്ള ഒരു ഗദ്യ​നാ​ട​ക​മാ​ക്കി, ഇവയിൽ പല​തി​നേ​യും അധികം മാ​റ്റ​ങ്ങൾ വരു​ത്താ​തെ അഭി​ന​യി​ക്കു​വാൻ സാ​ധി​ക്കു​ന്ന​താ​ണു്. ഇങ്ങ​നെ ചെ​യ്യു​മ്പോൾ, വാ​സ്ത​വ​ത്തിൽ ഒരു ‘പ്ര​സ്താ​വന’ മാ​ത്ര​മായ ആദ്യ​ത്തെ മൂ​ന്നു് അദ്ധ്യാ​യ​ങ്ങ​ളി​ലെ വി​വ​ര​ണം നാ​ലാ​മ​ദ്ധ്യാ​യം​കൊ​ണ്ടു തു​ട​ങ്ങു​ന്ന ഒന്നാം​രം​ഗ​ത്തി​ലെ സം​ഭാ​ഷ​ണ​ത്തിൽ ഉൾ​ക്കൊ​ള്ളി​ക്കേ​ണ്ട​താ​യി വരും, അത്രേ​യു​ള്ളൂ.

പാ​ത്ര​സൃ​ഷ്ടി​യിൽ തകഴി ഏറി​യ​കൂ​റും സ്റ്റെൻ​ഡ​ലി​ന്റെ സാ​ങ്കേ​തി​ക​മാർ​ഗ്ഗം സ്വീ​ക​രി​ച്ചി​രി​ക്കു​ന്നു. ദൈ​നം​ദി​ന​ജീ​വി​ത​ത്തിൽ നാം സാ​ധാ​ര​ണ​യാ​യി കണ്ടു​മു​ട്ടാ​ത്ത​വ​രും, എന്നാൽ ചി​ല​പ്പോൾ ജന​സാ​മാ​ന്യ​ത്തി​ലെ പതി​ത​രു​ടേ​യും കി​റു​ക്ക​ന്മാ​രു​ടേ​യും കൂ​ട്ട​ത്തി​ലും, പല​പ്പോ​ഴും സമു​ദാ​യ​ത്തി​ന്റെ ഉന്ന​ത​ത​ട​ത്തി​ലെ അതി​സൂ​ക്ഷ്മാ​വ​ബോ​ധ​മു​ള്ള​വ​രു​ടെ കൂ​ട്ട​ത്തി​ലും നമു​ക്കു കണ്ടു​പി​ടി​ക്കാ​വു​ന്ന​വ​രും, നമ്മിൽ അനു​ക​മ്പ​യും ബഹു​മാ​ന​വും സ്നേ​ഹ​വും ജനി​പ്പി​ക്കു​ന്ന​തി​നു പകരം നീ​ര​സ​വും അസു​ഖ​വും അവ​ജ്ഞ​യും ഉത്ഭ​വി​പ്പി​ക്കു​ന്ന​വ​രു​മായ പാ​ത്ര​ങ്ങ​ളെ​യാ​ണു് ഏറി​യ​കൂ​റും സ്റ്റെൻ​ഡ​ലും തക​ഴി​യും സൃ​ഷ്ടി​ച്ചി​ട്ടു​ള്ള​തു്. ‘പര​മാർ​ത്ഥ​ങ്ങ​ളി’ലെ പത്മ​നാ​ഭ​പി​ള്ള, ജാ​ന​കി​യ​മ്മ, ഗോ​പ​കു​മാ​രൻ, ഗോ​സാ​യി എന്നി​വർ ഇത്ത​രം പാ​ത്ര​ങ്ങ​ളാ​ണു്. ഡാ​സ്റ്റോ​വ്സ്കി​യു​ടെ പാ​ത്ര​ങ്ങ​ളെ സ്റ്റെൻ​ഡ​ലി​ന്റെ പാ​ത്ര​ങ്ങ​ളേ​ക്കാൾ അപൂർ​വ്വ​മാ​യേ ഈ ലോ​ക​ത്തു കാ​ണാ​റു​ള്ളൂ. കലയിൽ അതി​ശ​യോ​ക്തി കൂ​ടി​യേ തീരൂ. യു​ക്തി​യും യു​ക്തി​ര​ഹി​ത​മായ ഉപ​ബോ​ധ​മ​ന​സ്സും തമ്മി​ലു​ണ്ടാ​കു​ന്ന കൊടിയ മാ​ന​സി​ക​മ​ത്സ​ര​ങ്ങൾ അത്യ​ധി​കം പൊ​ന്തി​ച്ചു​നി​ല്ക്കു​ന്ന​തു പ്ര​സ്തുത അസാ​ധാ​ര​ണ​മ​നു​ഷ്യ​രി​ലാ​ണു്. ഇതു​നി​മി​ത്ത​മ​ത്രേ മനഃ​ശ്ശാ​സ്ത്ര​നോ​വ​ലെ​ഴു​ത്തു​കാർ ഇത്ത​രം പാ​ത്ര​ങ്ങ​ളെ തേ​ടി​പ്പോ​കു​ന്ന​തും.

ഒരു ജന്തു​വി​ന്റെ അവ​യ​വ​ങ്ങൾ കീറി മു​റി​ച്ചു പരി​ശോ​ധി​ക്കു​ന്ന വി​ദ​ഗ്ദ്ധ​നായ ഒരു ശാ​സ്ത്ര​ജ്ഞ​ന്റെ അകൽ​ച്ച​പൂർ​വ്വം സ്റ്റെൻ​ഡൽ തന്റെ പാ​ത്ര​ങ്ങ​ളെ അപ​ഗ്ര​ഥി​ച്ചു നമു​ക്കു കാ​ട്ടി​ത്ത​രു​ന്നു. ഇതി​നോ​ട​ടു​ക്കു​ന്ന അപ​ഗ്ര​ഥ​ന​പാ​ട​വ​വും അകൽ​ച്ച​യും ‘പര​മാർ​ത്ഥ​ങ്ങ​ളി’ൽ കാണാം. ഈ സ്വ​ഭാ​വ​വി​ശ​ക​ല​നം നട​ത്തു​ന്ന​തി​നു സ്റ്റെൻ​ഡ​ലി​നെ​ക്കാ​ള​ധി​കം തകഴി സം​ഭാ​ഷ​ണ​ത്തെ ഉപ​യോ​ഗ​പ്പെ​ടു​ത്തി​യി​രി​ക്കു​ന്നു. ഇതിൽ അദ്ദേ​ഹം ഡാ​സ്റ്റോ​വ്സ്കി​യെ​യാ​ണു് അനു​ക​രി​ച്ചി​രി​ക്കു​ന്ന​തു്. ഒരു പാ​ത്രം ഇന്ന​ത​രം മനു​ഷ്യ​നാ​ണെ​ന്നു വാ​യ​ന​ക്കാ​ര​നെ പറ​ഞ്ഞു മന​സ്സി​ലാ​ക്കു​ന്ന ‘സ്റ്റേ​ജ് ഡയ​റ​ക്ഷൻ​സ്’ ഡാ​സ്റ്റോ​വ്സ്കി​യി​ലും തക​ഴി​യി​ലും കാ​ണു​ന്ന​ത​ല്ല. തക​ഴി​യു​ടെ ഒരു പാ​ത്രം സം​സാ​രി​ക്കു​വാൻ തു​ട​ങ്ങു​മ്പോൾ, അയാ​ളു​ടെ ആദി​വാ​ക്കു​ക​ളിൽ​നി​ന്നു് അയാൾ ഏതു​ത​രം മനു​ഷ്യ​നാ​ണെ​ന്നു നമു​ക്കു മന​സ്സി​ലാ​ക്കു​വാൻ സാ​ധി​ക്കു​ന്നു. വി​ഷാ​ദാ​ത്മ​ക​ത്വ​ത്തി​ന്റെ പാ​ര​മ്യ​ത്തി​ലും തക​ഴി​ക്കു സ്റ്റെൻ​ഡ​ലി​നോ​ടാ​ണു്, ഡാ​സ്റ്റോ​വ്സ്കി​യോ​ട​ല്ല, സാ​ദൃ​ശ്യ​മു​ള്ള​തു്. ഡാ​സ്റ്റോ​വ്സ്കി​യു​ടെ നോ​വ​ലു​ക​ളിൽ സാ​ധാ​ര​ണ​യാ​യി പരി​ത​സ്ഥി​തി​യു​ടെ ചി​ത്രീ​ക​ര​ണം (സോ​ഷ്യൽ കണ്ട​ന്റ്) വള​രെ​യ​ധി​കം കു​റ​ഞ്ഞി​രി​ക്കും. സ്റ്റെൻ​ഡ​ലി​ന്റേ​യും ബൂർ​ഷേ​യു​ടേ​യും നോ​വ​ലു​ക​ളി​ലാ​വ​ട്ടെ, നാ​ച്ചു​റ​ലി​സ്റ്റ് നോ​വ​ലു​ക​ളിൽ കാ​ണാ​വു​ന്നി​ട​ത്തോ​ളം സോ​ഷ്യൽ കണ്ട​ന്റ് ദൃ​ശ്യ​മ​ല്ലെ​ങ്കി​ലും, അതു ഡാ​സ്റ്റോ​വ്സ്കി​യു​ടെ കൃ​തി​ക​ളി​ലു​ള്ള​തി​നെ​ക്കാൾ ഏറി​യി​രി​ക്കും. ഇതിൽ തക​ഴി​ക്കു സ്റ്റെൻ​ഡ​ലി​നോ​ടും ബൂർ​ഷേ​യോ​ടു​മാ​ണു് സാ​ദൃ​ശ്യ​മു​ള്ള​തു്. ഉദാ​ഹ​ര​ണ​മാ​യി, ‘പര​മാർ​ത്ഥ​ങ്ങ​ളി’ൽ ഒരു പഴയ കു​ടും​ബ​ത്തി​ന്റെ ക്ഷയം സാ​മാ​ന്യ​മാ​യി ചി​ത്രീ​ക​രി​ച്ചി​രി​ക്കു​ന്ന​തും, മക്ക​ത്താ​യ​കു​ടും​ബ​ങ്ങ​ളി​ലെ പെ​ണ്ണു​ന്ന​ളെ​ക്കാ​ള​ധി​കം സ്വാ​ത​ന്ത്ര്യ​മു​ണ്ടെ​ന്നു​ള്ള ഒരു സാ​മു​ദാ​യി​ക​വീ​ക്ഷ​ണ​കോ​ടി പ്ര​തി​ബിം​ബി​ച്ചി​രി​ക്കു​ന്ന​തും നോ​ക്കുക.

ഒരു നല്ല മനഃ​ശ്ശാ​സ്ത്ര​നോ​വ​ലെ​ഴു​ത്തു​കാ​ര​നു് ഒന്നു​കിൽ ചി​ത്ത​ഭ്ര​മം, ചുഴലി എന്നീ മാ​ന​സി​ക​രോ​ഗ​ങ്ങ​ളോ, അല്ലെ​ങ്കിൽ ഗാ​ഢ​മായ മനഃ​ശ്ശാ​സ്ത്ര​ജ്ഞാ​ന​മോ ഉണ്ടാ​യി​രു​ന്നേ മതി​യാ​വൂ. നല്ല മനഃ​ശ്ശാ​സ്ത്ര​ചെ​റു​ക​ഥ​കൾ രചി​ച്ചി​ട്ടു​ള്ള ഗാർ​ഷിൻ എന്ന റഷ്യ​ക്കാ​രൻ ഒരു ചി​ത്ത​ഭ്ര​മ​രോ​ഗി​യും, ഉത്ത​മ​ങ്ങ​ളായ മനഃ​ശ്ശാ​സ്ത്ര​നോ​വ​ലു​കൾ എഴു​തി​യി​ട്ടു​ള്ള ഡാ​സ്റ്റോ​വ്സ്കി ഒരു ചു​ഴ​ലി​ദീ​ന​ക്കാ​ര​നു​മാ​ണു്. സ്റ്റെൻ​ഡ​ലി​നും ബൂർ​ഷേ​യ്ക്കും നല്ല മനഃ​ശ്ശാ​സ്ത്ര​ജ്ഞാ​ന​മു​ണ്ടാ​യി​രു​ന്നു. തക​ഴി​ക്കും ഫ്രാ​യ്ഡ്, ആഡ്ലർ എന്നീ ആധു​നിക മനഃ​ശ്ശാ​സ്ത്ര​ജ്ഞ​രു​ടെ വാ​ദ​ങ്ങ​ളെ​ക്കു​റി​ച്ചു നല്ല ജ്ഞാ​ന​മു​ണ്ടെ​ന്നു ‘പര​മാർ​ത്ഥ​ങ്ങൾ’ സ്ഥാ​പി​ക്കു​ന്നു​ണ്ടു്. മൂ​ന്നു ഉദാ​ഹ​ര​ണ​ങ്ങൾ ഇവിടെ പ്ര​സ്താ​വി​ക്കാം: പല മനു​ഷ്യ​രി​ലും ബാ​ല്യ​ത്തിൽ കാ​ണാ​വു​ന്ന അപ​കൃ​ഷ്ട​താ​ബോ​ധ​ത്തെ (ഇൻ​ഫീ​രി​യോ​റി​റ്റി കോം​പ്ലെ​ക്സ്) പ്ര​ത്യേ​കം ബല​പ്പെ​ടു​ത്തി ആഡ്ലർ മാ​ന​സി​കാ​പ​ഗ്ര​ഥ​ന​ത്തി​ന്റെ ഒരു പുതിയ വക​ഭേ​ദം സ്ഥാ​പി​ച്ചി​ട്ടു​ണ്ടു്. സെ​ക്സ് (ലൈം​ഗി​ക​ബോ​ധം) ജനി​പ്പി​ക്കു​ന്ന കോം​പ്ലെ​ക്സി​നെ (വി​കാ​ര​മ​ത്സ​രം) പ്പോ​ലെ അപ​കൃ​ഷ്ട​താ​ബോ​ധ​വും കോം​പ്ലെ​ക്സു​ക​ളെ ഉത്ഭ​വി​പ്പി​ക്കു​മെ​ന്നാ​യി​രു​ന്നു ആഡ്ല​റു​ടെ വാദം. ആഡ്ല​റു​ടെ ഈ വാ​ദ​ത്തെ ആസ്പ​ദി​ച്ചാ​ണു് തകഴി ജാ​ന​കി​യ​മ്മ​യെ സൃ​ഷ്ടി​ച്ചി​ട്ടു​ള്ള​തു്.

പ്ര​സ്തുത അപ​കൃ​ഷ്ട​താ​ബോ​ധം​മൂ​ലം ഭീ​രു​ക്ക​ളിൽ ഭീ​രു​വാ​യി​രു​ന്ന ജാ​ന​കി​യ​മ്മ തന്റെ മു​പ്പ​ത്തി​യെ​ട്ടാ​മ​ത്തെ വയ​സ്സിൽ പെ​ട്ടെ​ന്നു് ഒരു രക്ത​കാ​ളി​യാ​യി രൂ​പാ​ന്ത​ര​പ്പെ​ടു​ന്നു. ഈ രൂ​പാ​ന്ത​ര​പ്പെ​ടു​ത്ത​ലി​ലും തകഴി തന്റെ അച്ഛ​നി​ല്ലാ​ത്ത മകനായ പ്ര​ഭ​യെ വീ​ട്ടിൽ​നി​ന്നു പറ​ഞ്ഞ​യ​യ്ക്ക​ണ​മെ​ന്നു പത്മ​നാ​ഭ​പി​ള്ള ശഠി​ച്ച​പ്പോ​ഴാ​ണു് ജാ​ന​കി​യ​മ്മ​യിൽ ഈ രൂ​പാ​ന്ത​രം സം​ഭ​വി​ക്കു​ന്ന​തു്. പ്ര​ഭ​യോ​ടു​ള്ള സ്നേ​ഹാ​ധി​ക്യ​മാ​ണു് ഇതിനു ഹേ​തു​വെ​ന്നു പറ​യു​ന്ന​തു സൂ​ക്ഷ്മ​മാ​യി​രി​ക്കു​ന്ന​ത​ല്ല. പ്ര​ഭ​യോ​ടു ജാ​ന​കി​യ​മ്മ​യ്ക്കു​ള്ള വി​കാ​രം സ്നേ​ഹ​വും വെ​റു​പ്പും കലർ​ന്ന ഒരു സങ്കീർ​ണ്ണ​വി​കാ​ര​മാ​ണെ​ന്നു ആ സ്ത്രീ​ത​ന്നെ അവനെ ധരി​പ്പി​ക്കു​ന്നു​ണ്ടു്. ഈ സ്നേ​ഹം അവ​ളു​ടെ ഉപ​ബോ​ധ​മ​ന​സ്സി​ലും, വെ​റു​പ്പു് അവ​ളു​ടെ യു​ക്തി​യി​ലു​മാ​ണു് സ്ഥി​തി​ചെ​യ്യു​ന്ന​തു്. പ്ര​സ്തുത സങ്കീർ​ണ്ണ​വി​കാ​ര​ത്തി​ന്റെ പര​സ്പ​ര​വി​രു​ദ്ധ​ങ്ങ​ളായ ഘട​ക​ങ്ങൾ നി​മി​ത്തം അതിലെ സ്നേ​ഹാം​ശ​ത്തി​നു് ഈ രൂ​പാ​ന്ത​രം വരു​ത്തു​വാൻ വേണ്ട ശക്തി​യു​ണ്ടാ​യി​രി​ക്കു​ന്ന​ത​ല്ല. ഭാ​ര​തീയ സ്ത്രീ​ക​ളിൽ സാ​ധാ​ര​ണ​യാ​യി മു​പ്പ​ത്തി​യെ​ട്ടു വയ​സ്സി​നു സമീ​പി​ച്ചു് ആർ​ത്ത​വം നി​ന്നു​പോ​കു​ന്ന ഒരു ജീ​വി​ത​ഘ​ട്ടം തു​ട​ങ്ങും. ഈ ഘട്ട​ത്തിൽ ഉപ​ബോ​ധ​മ​ന​സ്സിൽ സ്ഥാ​പി​ത​മായ അവ​രു​ടെ സെ​ക്സ് വി​കാ​ര​ങ്ങൾ അതി​തീ​വ്ര​മാ​യി പ്ര​വർ​ത്തി​ക്കു​ന്ന​താ​ണെ​ന്നു് ആധു​നി​ക​മ​നഃ​ശ്ശാ​സ്ത്ര​ജ്ഞർ കണ്ടു​പി​ടി​ച്ചി​ട്ടു​ണ്ടു്. ഈ ഘട്ട​ത്തി​ലെ (ക്ലൈ​മാ​റ്റെ​റി​ക്ക്, അഥവാ മെ​നോ​പാ​സ്) സ്ത്രീ​ഹൃ​ദ​യ​ത്തി​ന്റെ വി​ശ്വ​രൂ​പം പച്ച​യാ​യി കാ​ണ​ണ​മെ​ങ്കിൽ കാരൻ മൈ​കേ​ലി​സ് എന്ന ഡെ​ന്മാർ​ക്കു​കാ​രി​യു​ടെ ‘ആപൽ​ക്ക​ര​മായ പ്രാ​യം’ എന്ന കു​പ്ര​സി​ദ്ധ​മായ നോവൽ വാ​യി​ക്കുക. ജാ​ന​കി​യ​മ്മ​യു​ടെ ഉപ​ബോ​ധ​മ​ന​സ്സി​ലെ പ്ര​സ്തുത സ്നേ​ഹ​ത്തെ ഉപ​ബോ​ധ​മ​ന​സ്സിൽ​ത്ത​ന്നെ സ്ഥാ​പി​ത​മായ ഈ സെ​ക്സ് വി​കാ​രം ബല​പ്പെ​ടു​ത്തി​യ​തു നി​മി​ത്ത​മ​ത്രേ ആ അതി​ഭീ​രു​വായ സ്ത്രീ ഒരു രക്ത​കാ​ളി​യാ​യി രൂ​പാ​ന്ത​ര​പ്പെ​ടു​ന്ന​തും.

ഫ്രാ​യ്ഡി​ന്റെ മാ​ന​സി​കാ​പ​ഗ്ര​ഥ​ന​വു​മാ​യു​ള്ള പരി​ച​യം പത്മ​നാ​ഭ​പി​ള്ള​യു​ടെ സൃ​ഷ്ടി​യിൽ തകഴി കാ​ണി​ച്ചി​ട്ടു​ണ്ടു്. പ്രേ​മം ഒരാ​ളിൽ മാ​ത്രം കേ​ന്ദ്രീ​ക​രി​ക്കു​ന്ന​തി​നെ തട​യു​വാൻ സദാ ശ്ര​മി​ച്ചു​കൊ​ണ്ടി​രി​ക്കു​ന്ന ഉപ​ബോ​ധ​മ​ന​സ്സു്, പ്ര​കൃ​ത്യാ പ്രേ​മി​ക്കു​വാൻ അശ​ക്ത​രായ ദുർ​ബ്ബ​ല​ഭർ​ത്താ​ക്ക​ന്മാ​രിൽ രണ്ടു​വി​ധ​ത്തിൽ പ്ര​വർ​ത്തി​ച്ചേ​യ്ക്കു​മെ​ന്നു വി​യ​ന്ന​യി​ലെ ഒരു മാ​ന​സി​കാ​പ​ഗ്ര​ഥ​ന​വി​ദ​ഗ്ദ്ധ​നായ ഡാ​ക്ടർ ഗു​തെ​യിൽ ചൂ​ണ്ടി​ക്കാ​ണി​ച്ചി​ട്ടു​ണ്ടു്. ഒന്നു​കിൽ വി​വാ​ഹ​ത്തി​നു​മു​മ്പു​ള്ള സെ​ക്സ് അനു​ഭ​വ​ങ്ങൾ തു​റ​ന്നു പറ​യു​വാൻ ഭാ​ര്യ​യോ​ടു് ആവ​ശ്യ​പ്പെ​ടു​ന്ന​തി​നു് അതു് അയാ​ളോ​ടു് ഉപ​ദേ​ശി​ക്കും. ഈ ലൈം​ഗി​കാ​നു​ഭവ സമ്മ​തം സം​ഭ​വി​ക്കു​മ്പോൾ അയാൾ ഭാ​ര്യ​യിൽ​നി​ന്നു് അക​ന്നു പോ​കു​മെ​ന്നു വി​ചാ​രി​ച്ചാ​ണു് ഉപ​ബോ​ധ​മ​ന​സ്സു് ഈ ഉപ​ദേ​ശം നല്കു​ന്ന​തു്. അല്ലെ​ങ്കിൽ, ഇതിനു നേരേ വി​രു​ദ്ധ​മായ ഒരു പദ്ധ​തി സ്വീ​ക​രി​ക്കു​വാൻ ഉപ​ബോ​ധ​മ​ന​സ്സു ഭർ​ത്താ​വി​നെ പ്രേ​രി​പ്പി​ക്കും. തന്റെ സ്വ​ന്തം കു​റ​വു​ക​ളെ പർ​വ്വ​തീ​ക​രി​ച്ചു തു​റ​ന്നു​കാ​ട്ടി ഭാ​ര്യ​യെ പ്ര​ണ​യ​ത്തിൽ​നി​ന്നു് അക​റ്റു​ന്ന ഒരു​ത​രം മാ​ന​സി​ക​പ്ര​ദർ​ശ​നം (സൈ​ക്കി​ക്ക് എക്സി​ഹി​ബി​ഷ​ണി​സം) നട​ത്തു​ന്ന​താ​ണു് ഈ പദ്ധ​തി. അതി​സു​ന്ദ​രി​യായ ജാ​ന​കി​യ​മ്മ​യു​ടെ അച്ഛ​നി​ല്ലാ​ത്ത മകനായ പ്ര​ഭ​യോ​ടും, അവ​ളോ​ടു​ത​ന്നെ​യും അതി​ക്രൂ​ര​മാ​യി പത്മ​നാ​ഭ​പി​ള്ള പെ​രു​മാ​റി​വ​ന്ന​താ​യി തകഴി ചി​ത്രീ​ക​രി​ച്ചി​ട്ടു​ള്ള​തി​നു കാരണം രണ്ടാ​മ​തു പറഞ്ഞ മാ​ന​സി​ക​പ്ര​ദർ​ശ​ന​മാ​ണു​താ​നും.

തക​ഴി​യു​ടെ ഭാ​ഷാ​രീ​തി പ്ര​സ​ന്ന​വും സര​ള​വു​മാ​ണു്. വി​ഷ​യ​വൈ​വി​ധ്യ​രാ​ഹി​ത്യ​വും, സോ​ഷ്യൽ കണ്ട​ന്റി​ന്റെ പോ​രാ​യ്മ​യു​മാ​ണു് അദ്ദേ​ഹ​ത്തി​ന്റെ കൃ​തി​ക​ളി​ലെ പ്ര​ധാന കു​റ​വു​കൾ. ഇവയെ പരി​ഹ​രി​ച്ചാൽ അദ്ദേ​ഹ​ത്തി​നു പൂർ​വ്വാ​ധി​കം വിജയം നേടാൻ സാ​ധി​ക്കും.

ഗ്ര​ന്ഥ​കർ​ത്താ: തകഴി ശി​വ​ശ​ങ്ക​ര​പി​ള്ള

(തകഴി ശി​വ​ശ​ങ്ക​ര​പി​ള്ള​യു​ടെ നോ​വ​ലി​നു് കേസരി ബാ​ല​കൃ​ഷ്ണ​പി​ള്ള എഴു​തിയ നി​രൂ​പ​ണം.)

കേസരി ബാ​ല​കൃ​ഷ്ണ​പി​ള്ള​യു​ടെ ലഘു ജീ​വ​ച​രി​ത്രം.