ശ്രീ. പൊ​റ്റെ​ക്കാ​ട്ടി​ന്റെ ഉത്തമ കഥ​ക​ളി​ലൊ​ന്നും, നല്ല കഥ​ക​ളിൽ മൂ​ന്നും, വെറും സാ​ധാ​രണ കഥ​ക​ളിൽ ഒന്നും അട​ങ്ങിയ ഒരു ചെ​റു​ക​ഥാ​സ​മാ​ഹാ​ര​മാ​ണു് പ്ര​കൃ​ത​ഗ്ര​ന്ഥം. റി​യ​ലി​സ്റ്റ് സാ​ങ്കേ​തി​ക​മാർ​ഗ്ഗം പ്ര​യോ​ഗി​ച്ചി​ട്ടു​ള്ള ഒരു പരാ​ജ​യ​പ്ര​സ്ഥാന കഥയായ “ആശ്ര​മ​ത്തി​ന്റെ നെ​ടു​വീർ​പ്പു​കൾ” ആണു് ഉത്ത​മം. നല്ല കഥകൾ, ഒരു റൊ​മാ​ന്റി​ക് പ്ര​സ്ഥാ​ന​ക​ഥ​യായ “പ്ര​തി​കാ​ര​ത്തി​ന്റെ പരി​ണാ​മം”, റി​യ​ലി​സ്റ്റ് സാ​ങ്കേ​തിക മാർ​ഗ്ഗം പ്ര​യോ​ഗി​ച്ചി​ട്ടു​ള്ള പരാ​ജ​യ​പ്ര​സ്ഥാ​ന​ക​ഥ​ക​ളായ “ആ ചെ​രി​പ്പു്” “ഒരു​റു​പ്പി​ക​യു​ടെ കടം” എന്നി​വ​യാ​ണു്. സാ​ധാ​രണ കഥ റൊ​മാ​ന്റി​ക് പ്ര​സ്ഥാ​ന​ത്തിൽ​പ്പെ​ട്ട “വന​റാ​ണി”യും.

ഒരു കു​ഷ്ഠ​രോ​ഗി​ക്കോ​ള​ണി​യി​ലെ ജീ​വി​ത​വും, ഈ രോ​ഗി​ക​ളിൽ ഒരു​ത്ത​ന്റെ പ്ര​ണ​യ​വും ഭം​ഗി​യാ​യി ചി​ത്രീ​ക​രി​ച്ചി​ട്ടു​ള്ള “ആശ്ര​മ​ത്തി​ന്റെ നെ​ടു​വീർ​പ്പു​കൾ” ആദ്യ​മാ​യി എടു​ക്കാം. പ്ര​സ്തുത കോ​ള​ണി​യി​ലെ തോ​ട്ട​ത്തിൽ​നി​ന്നു് ഒരു അശോ​ക​പ്പൂ​ങ്കുല, ആ സ്ഥലം കു​ഷ്ഠ​രോ​ഗി​ക​ളു​ടെ പാർ​പ്പി​ട​മാ​ണെ​ന്ന​റി​യാ​തെ, വഴി​യേ​പോയ ഒരു ബാലിക പറി​ച്ചെ​ടു​ക്കു​ന്ന​തും, അവിടെ തൂ​ക്കി​യി​രു​ന്ന ബോർ​ഡിൽ​നി​ന്നു് ആ സ്ഥ​ല​ത്തി​ന്റെ യാ​ഥാർ​ത്ഥ്യം ഗ്ര​ഹി​ച്ച​പ്പോൾ, അവൾ അതി​ര​റ്റ അറ​പ്പോ​ടും ഭീ​തി​യോ​ടും​കൂ​ടി അതു വലി​ച്ചെ​റി​ഞ്ഞു​കൊ​ണ്ടു് ഓടി​പ്പോ​കു​ന്ന​തും, ചി​ത്രീ​ക​രി​ക്കു​ന്ന ഈ കഥ​യി​ലെ പ്ര​ഥ​മ​രം​ഗം തന്നെ ഗ്ര​ന്ഥ​കാ​ര​ന്റെ മി​ക​ച്ച കലാ​വാ​സന പ്ര​സ്പ​ഷ്ട​മാ​ക്കു​ന്നു​ണ്ടു്. മറ്റു് മൂ​ന്നു വി​ധ​ത്തി​ലും​കൂ​ടി ഈ കഥ​യ്ക്കു പ്ര​ധാ​ന്യ​മു​ണ്ടു്. വി​ഷ​യ​ത്തി​ന്റെ പു​തു​മ​യും, കലാ​സ്ഥി​തി​യോ​ടു​ള്ള പൊ​രു​ത്ത​വും ഇതിനു പ്രാ​ധാ​ന്യം നൽ​കു​ന്നു. കൂ​ടാ​തെ, ഭാ​ഷാ​ക​ഥ​യെ​ഴു​ത്തി​ലെ ഒരു പ്ര​ധാന കു​റ​വും ഇതു സൂ​ചി​പ്പി​ക്കു​ന്നു​ണ്ടു്. കു​ഷ്ഠ​രോ​ഗി​ക​ളു​ടെ ജീ​വി​തം ഭാ​ഷാ​സാ​ഹി​ത്യ​കാ​ര​ന്മാർ ഏതൽ​പ​ര്യ​ന്തം വി​ഷ​യ​മാ​ക്കീ​ട്ടു​ള്ള​താ​യി അറി​വി​ല്ല. മനു​ഷ്യ​രു​ടെ സ്വാർ​ത്ഥ​ത​യും അജ്ഞ​ത​യും നി​മി​ത്തം, യു​ഗ​ങ്ങ​ളാ​യി അവ​രു​ടെ അതി​ര​റ്റ ക്രൂ​ര​ത​യ്ക്കു് ഇര​യാ​യി ഭവി​ച്ചി​ട്ടു​ള്ള കു​ഷ്ഠ​രോ​ഗി​ക​ളു​ടെ അതി​ദ​യ​നീ​യ​വും ആശ​യ​റ്റ​തു​മായ ജീ​വി​ത​ത്തെ, ആർ​ത്ത​രോ​ടു​ള്ള ഉള്ള​ഴി​ഞ്ഞ കരു​ണ​യും സർ​വ്വ​സാ​ഹോ​ദ​ര്യ​വും മു​ദ്രാ​വാ​ക്യ​ങ്ങ​ളാ​യി​ത്തീർ​ന്നി​ട്ടു​ള്ള ഇന്ന​ത്തെ മനഃ​സ്ഥി​തി​ക്കു് അനു​യോ​ജ്യ​മാ​യി, ഗ്ര​ന്ഥ​കാ​രൻ ഇതിൽ ഹൃ​ദ​യ​സ്പൃ​ക്കാ​കും​വ​ണ്ണം വർ​ണ്ണി​ച്ചി​രി​ക്കു​ന്നു. ഇവ​രോ​ടു​ള്ള സമു​ദാ​യ​ത്തി​ന്റെ അതി​ക്രൂ​ര​മായ പെ​രു​മാ​റ്റ​ത്തി​നു കാ​ര​ണ​മായ അതി​ഭ​യം ഇന്ന​ത്തെ ശാ​സ്ത്ര​ത്തി​ന്റെ കണ്ടു​പി​ടി​ത്ത​ങ്ങ​ളു​ടെ വെ​ളി​ച്ച​ത്തിൽ ഏറി​യ​കൂ​റും ന്യാ​യീ​ക​രി​ക്ക​ത്ത​ക്ക​ത​ല്ല. ഈ പെ​രു​മാ​റ്റം ഈ രോ​ഗ​ത്തെ ഉന്മൂ​ല​നം ചെ​യ്യു​ന്ന​തി​നു് വി​ഘാ​ത​മാ​യി നി​ല്ക്കു​ന്നു​ണ്ടു്. പ്ര​സ്തുത രണ്ടു പര​മാർ​ത്ഥ​ങ്ങ​ളും സൂ​ചി​പ്പി​ക്കു​ന്ന​തി​നു​ദ്യ​മി​ക്കാ​തെ, ഈ പെ​രു​മാ​റ്റം അനി​വാ​ര്യ​വും ശോ​ച​നീ​യ​വു​മായ ഒരു ദുഃ​സ്ഥി​തി​യാ​ണെ​ന്നു​ള്ള പരാ​ജ​യ​ഭാ​വം ഗ്ര​ന്ഥ​കാ​രൻ സ്വീ​ക​രി​ച്ചി​രി​ക്കു​ന്ന​താ​ണു് ഭാ​ഷാ​ക​ഥ​യെ​ഴു​ത്തി​ലെ ഒരു സാ​ര​മായ കുറവു ധ്വ​നി​പ്പി​ക്കു​ന്ന​തും. ഒടു​ക്കം പറഞ്ഞ പോ​യി​ന്റി​നെ വി​ശ​ദീ​ക​രി​ക്കേ​ണ്ടി​യി​രി​ക്കു​ന്നു.

കു​ഷ്ഠ​രോ​ഗ​ത്തെ​ക്കു​റി​ച്ചു് അടു​ത്ത​കാ​ല​ത്തു നട​ത്തി​യി​ട്ടു​ള്ള പല ശാ​സ്ത്രീ​യ​പ​ര്യ​വേ​ഷ​ണ​ങ്ങ​ളു​ടേ​യും ഫല​മാ​യി, അതു പി​ടി​പെ​ട്ടി​ട്ടു​ള്ള ലോ​ക​ത്തി​ലെ ഇരു​പ​തു ലക്ഷ​ത്തിൽ​പ​രം നിർ​ഭാ​ഗ്യ​വാ​ന്മാർ​ക്കു് ആശയും ആശ്വാ​സ​വും നല്കു​ന്ന പല കണ്ടു​പി​ടി​ത്ത​ങ്ങ​ളും ഇന്നു​ണ്ടാ​യി​രി​ക്കു​ന്നു. ക്ഷ​യ​രോ​ഗ​ത്തി​നു ഉപ​യോ​ഗി​ച്ചു​വ​രു​ന്ന സൽഫോൺ ഔഷ​ധ​ങ്ങൾ കു​ഷ്ഠ​ത്തി​നു് കൂ​ടു​തൽ പ്ര​യോ​ജ​ന​ക​ര​മാ​ണെ​ന്നു് കണ്ടു​പി​ടി​ച്ചി​ട്ടു​ള്ള​തു് ലോ​ക​ത്തിൽ​നി​ന്നു് ഈ ക്ഷ​യ​രോ​ഗം അക​റ്റാ​മെ​ന്ന ആശ ഉദി​പ്പി​ച്ചി​ട്ടു​ണ്ടെ​ന്നു ബ്രി​ട്ടീ​ഷ് എമ്പ​യർ ലെ​പ്ര​സി റി​ലീ​ഫ് അസോ​സി​യേ​ഷ​ന്റെ മെ​ഡി​ക്കൽ സെ​ക്ര​ട്ട​റി​യായ ഡാ​ക്ടർ മുയിർ 1947-ലെ “ബ്രി​ട്ടീ​ഷ് മെ​ഡി​ക്കൽ ജേർ​ണ​ലി”ന്റെ ഒരു ലക്ക​ത്തിൽ എഴു​തി​യി​രു​ന്നു. “പ്രോ​മിൻ” എന്നും “ഡയാ​സോൺ” എന്നും പേ​രു​ക​ളു​ള്ള രണ്ടു സൽഫോൺ ഔഷ​ധ​ങ്ങൾ മുഖേന 19 കു​ഷ്ഠ​രോ​ഗി​ക​ളു​ടെ ദീനം പാടെ മാ​റ്റി പറ​ഞ്ഞ​യ​ച്ചി​ട്ടു​ണ്ടെ​ന്നു യു​ണൈ​റ്റ​ഡ് സ്റ്റേ​റ്റ്സി​ലെ കാർ​വി​ല്ലി​ലെ മറൈൻ ആസ്പ​ത്രി​യി​ലെ ഡോ​ക്ടർ ഫാ​ജെ​റ്റ് ഈയ്യി​ടെ പ്ര​സ്താ​വി​ക്കു​ക​യു​ണ്ടാ​യി. ഡി​ഫ്തീ​രിയ എന്ന തൊ​ണ്ട​വ്യാ​ധി​യു​ടെ രോ​ഗ​ബീ​ജ​ങ്ങ​ളിൽ​നി​ന്നു നിർ​മ്മി​ച്ച “ഓക്സി​ഡി​ഫ്ത്തീ​രി​ക്ക് ആസിഡ്” എന്ന പുതിയ ഔഷധം കു​ഷ്ഠ​ത്തി​നു് ഒരു സി​ദ്ധൗ​ഷ​ധ​മാ​ണെ​ന്നു രണ്ടു സോ​വി​യ​റ്റ് ശാ​സ്ത്ര​ജ്ഞർ ഈയിടെ കണ്ടി​പി​ടി​ച്ചി​ട്ടു​ണ്ടു്. ഇന്റർ​നാ​ഷ​ണൽ ലെ​പ്ര​സി അസോ​സി​യേ​ഷ​ന്റെ ഉപ​ദേ​ഷ്ടാ​ക്ക​ളിൽ ഒരാ​ളായ റൊ​ഡേ​ഷ്യ​യി​ലെ ഡാ​ക്ടർ മോ​യ്സെർ പാ​റ്റ​ക​ളാ​ണു് ഈ രോഗം പര​ത്തു​ന്ന​തെ​ന്നു് ഈയിടെ അഭി​പ്രാ​യ​പ്പെ​ട്ടി​രു​ന്നു. വേണ്ട മുൻ​ക​രു​ത​ലോ​ടു​കൂ​ടി കു​ഷ്ഠ​രോ​ഗി​ക​ളോ​ടു് അടു​ത്തു പെ​രു​മാ​റി​യാൽ, അതു പക​രു​ന്ന​ത​ല്ലെ​ന്നാ​ണു് ഇന്ന​ത്തെ വി​ദ​ഗ്ദ്ധാ​ഭി​പ്രാ​യം. ഈ കണ്ടു​പി​ടു​ത്ത​ങ്ങൾ അറി​യാ​യ്ക​യാ​ലാ​ണ​ത്രേ സമു​ദാ​യം ഈ രോ​ഗി​ക​ളോ​ടു് അതി​നിർ​ദ്ദ​യ​മാ​യി പെ​രു​മാ​റി​വ​രു​ന്ന​തും.

അജ്ഞാ​ന​ത്തിൽ നി​ന്നു​ത്ഭ​വി​ച്ച പ്ര​സ്തുത പെ​രു​മാ​റ്റം​പോ​ലെ, ശാ​സ്ത്ര​ത്തി​ന്റെ അർ​ദ്ധ​ജ്ഞാ​നം നി​മി​ത്തം സി​ഫി​ലി​സ് (ചി​ത്ത​പ്പു​ണ്ണു്) രോ​ഗി​ക​ളോ​ടു് അമേ​രി​ക്ക​ക്കാർ ക്രൂ​ര​മാ​യി പെ​രു​മാ​റി​വ​രു​ന്നു​ണ്ടു്. ഈ രോ​ഗി​ക​ളോ​ടു​ള്ള അടു​ത്ത സം​സർ​ഗ്ഗ​വും, ഇവർ ഉപ​യോ​ഗി​ക്കു​ന്ന സാ​ധ​ന​ങ്ങ​ളെ തൊ​ടു​ന്ന​തു​പോ​ലും, രോഗം പകർ​ത്തു​ന്നു എന്നു​ള്ള അടി​സ്ഥാ​ന​ര​ഹി​ത​മായ വി​ശ്വാ​സം ഹേ​തു​വാ​യി അമേ​രി​ക്ക​യി​ലെ ഫാ​ക്ട​റി തൊ​ഴി​ലാ​ളി​കൾ ഇതു പി​ടി​പെ​ട്ടി​ട്ടു​ള്ള വേ​ല​ക്കാ​രെ വച്ചു​കൊ​ണ്ടി​രി​ക്കു​ന്ന ഫാ​ക്ട​റി​ക​ളിൽ പണി​മു​ട​ക്കു നട​ത്തു​ക​യും, ഫാ​ക്ട​റി ഉട​മ​സ്ഥ​ന്മാർ രക്ത​പ​രി​ശോ​ധന മുഖേന സി​ഫി​ലി​സ് പി​ടി​കൂ​ടി​യി​ട്ടു​ണ്ടെ​ന്നു കണ്ടു​പി​ടി​ച്ചി​ട്ടു​ള്ള തൊ​ഴി​ലാ​ളി​കൾ​ക്കു് വേല കൊ​ടു​ക്കാ​തെ​യി​രി​ക്കു​ക​യും ചെ​യ്തു​വ​രു​ന്നു. രോ​ഗി​ക​ളു​ടെ സ്പർ​ശ​ന​മേ​റ്റ നിർ​ജ്ജീ​വ​സാ​ധ​ന​ങ്ങൾ മുഖേന സി​ഫി​ലി​സ്സും ഗൊ​ണോ​റി​യ​യും പക​രു​ന്ന​ത​ല്ലെ​ന്നും, പാ​ര​മ്പ​ര്യ​മാ​യി ഇവ പി​ടി​പെ​ട്ടി​ട്ടു​ള്ള​വ​രു​ടെ കാ​ര്യം വി​ഗ​ണി​ക്കു​ന്ന​താ​യാൽ, മൈ​ഥു​ന​ക്രിയ മുഖേന മാ​ത്ര​മേ ഇവ പക​രു​ക​യു​ള്ളൂ എന്നു പറ​യാ​മെ​ന്നും, അമേ​രി​ക്ക​യി​ലെ ജാൺ​ഹോ​പ്കിൻ​സ് സ്ക്കൂൾ ഓഫ് ഹൈജീൻ ആന്റ് പബ്ളി​ക്ക് ഹെൽ​ത്ത് എന്ന സ്ഥാ​പ​ന​ത്തി​ലെ ജന​നേ​ന്ദ്രി​യ​രോ​ഗ​വി​ദ​ഗ്ദ്ധൻ ഡാ​ക്ടർ നെൽസൺ അടു​ത്ത​കാ​ല​ത്തു് അഭി​പ്രാ​യ​പ്പെ​ട്ടി​രു​ന്ന​തും ഇവിടെ സ്മ​ര​ണീ​യ​മാ​ണു്.

സമു​ദാ​യ​ത്തി​ലെ സാ​മ്പ​ത്തിക അനീ​തി​ക​ളെ അക​റ്റു​വാൻ സോ​ഷ്യോ​ള​ജി​യു​ടെ സി​ദ്ധാ​ന്ത​ങ്ങ​ളും, സമു​ദാ​യാം​ഗ​ങ്ങ​ളു​ടെ ലൈം​ഗി​ക​ജീ​വി​ത​ത്തി​ലെ അനീ​തി​ക​ളെ അക​റ്റു​വാൻ ലൈം​ഗി​ക​ശാ​സ്ത്ര​സി​ദ്ധാ​ന്ത​ങ്ങ​ളും, ഇന്ന​ത്തെ ബൃഹത് പു​രോ​ഗ​മ​ന​സാ​ഹി​ത്യ​പ്ര​സ്ഥാ​ന​ക്കാർ തങ്ങ​ളു​ടെ കൃ​തി​ക​ളിൽ ഉൾ​ക്കൊ​ള്ളി​ച്ചു​വ​രു​ന്നു​ണ്ട​ല്ലോ. ഇക്കാ​ര്യ​ങ്ങ​ളിൽ സോ​ഷ്യൽ സയൻ​സു​ക​ളു​ടെ തത്വ​ങ്ങ​ളെ ഉപ​യോ​ഗ​പ്പെ​ടു​ത്തു​ന്ന​തു​പോ​ലെ, ചി​ല​ത​രം മഹാ​രോ​ഗി​ക​ളോ​ടു് സമു​ദാ​യം കാ​ണി​ച്ചു​വ​രു​ന്ന അനീ​തി​ക​ളെ അക​റ്റു​വാ​നാ​യി പ്ര​സ്തുത സാ​ഹി​ത്യ​കാ​ര​ന്മാർ നാ​ച്ചു​റൽ സയൻ​സു​ക​ളു​ടെ കണ്ടു​പി​ടി​ത്ത​ങ്ങ​ളെ​യും തങ്ങ​ളു​ടെ കൃ​തി​ക​ളിൽ ഉൾ​ക്കൊ​ള്ളി​ക്കേ​ണ്ട​ത​ല്ലേ? ഇതാ​ണു് ശ്രീ: പൊ​റ്റെ​ക്കാ​ട്ടി​ന്റെ കഥ അങ്കു​രി​പ്പി​ക്കു​ന്ന പ്ര​ത്യേ​ക​പ്ര​ശ്നം. ഇതി​നു​പു​റ​മേ, ഒരു സാ​മാ​ന്യ​പ്ര​ശ്നം​കൂ​ടി ഈ കഥ ഉത്ഭ​വി​പ്പി​ക്കു​ന്നു​ണ്ടു്. അപ്ലൈ​ഡ് സയൻ​സി​ന്റെ (പ്രാ​യോ​ഗി​ക​ശാ​സ്ത്ര​ത്തി​ന്റെ) പു​രോ​ഗ​തി​യെ തങ്ങ​ളു​ടെ ഭാവന മുഖേന സാ​ഹി​ത്യ​കാ​ര​ന്മാർ​ക്കു—പ്ര​ത്യേ​കി​ച്ചു്, കാ​ഥി​കർ​ക്കു്—സഹാ​യി​ക്കു​വാൻ സാ​ധി​ക്കു​ക​യി​ല്ലേ എന്ന​താ​ണു് പ്ര​സ്തുത സമാ​ന്യ​പ്ര​ശ്നം. സാ​ഹി​ത്യ​കാ​ര​ന്റെ നി​യ​ന്ത്രി​ത​ഭാ​വ​ന​യും (ഇമാ​ജി​നേ​ഷ​നും), പ്രാ​യോ​ഗിക ശാ​സ്ത്ര​ത്തി​ന്റെ കണ്ടു​പി​ടി​ത്ത​ത്തി​ന്നു വേ​ണ്ട​തായ നി​യ​ന്ത്രി​ത​ഭാ​വ​ന​യും, മൗ​ലി​ക​മാ​യി ഒന്നു​പോ​ലെ​യു​ള്ള​വ​യാ​ണെ​ന്നു്— അതാ​യ​തു്, സ്മ​ര​ണ​യി​ലും നി​രീ​ക്ഷ​ണ​ത്തി​ലും നി​ന്നു ലഭി​ക്കു​ന്ന വസ്തു​ത​ക​ളെ പുതിയ രീ​തി​യിൽ സജ്ജീ​ക​രി​ക്കു​ന്ന​താ​ണെ​ന്നു്—ഇന്ന​ത്തെ മനഃ​ശ്ശാ​സ്ത്ര​ജ്ഞർ സ്ഥാ​പി​ച്ചി​ട്ടു​ള്ള​തു് ഇതു സാ​ധി​ക്കു​മെ​ന്നു് ഉത്ത​രം പറയാൻ നമ്മെ ധൈ​ര്യ​പ്പെ​ടു​ത്തു​ന്നു​ണ്ടു്. കൂ​ടാ​തെ,ശാ​സ്ത്രീ​യ​സാ​ധ്യ​ത​ക​ളെ​ക്കു​റി​ച്ചു ഭാ​വ​നാ​പ​ര​മാ​യി പ്ര​തി​പാ​ദി​ച്ചി​ട്ടു​ള്ള ചില പാ​ശ്ചാ​ത്യ കാ​ഥി​ക​രു​ടെ ആശ​യ​ങ്ങ​ളും, ഇവ​യ്ക്ക​പ്പു​റ​വും, പിൽ​ക്കാ​ല​ത്തെ പ്രാ​യോ​ഗി​ക​ശാ​സ്ത്ര​ജ്ഞർ സാ​ധ്യ​മാ​ണെ​ന്നു് പര്യ​വേ​ഷ​ണം മുഖേന സ്ഥാ​പി​ക്കു​ക​യോ, നട​പ്പിൽ​വ​രു​ത്തു​ക​യോ ചെ​യ്തി​ട്ടു​ള്ള​തും ഇവിടെ ശ്ര​ദ്ധേ​യ​മാ​ണു്. എച്ച്. ജി. വെ​ത്സി ന്റെ “ദി കൺ​ട്രി ഓഫ് ദി ബ്ളൈൻ​ഡ്” (കു​രു​ട​രു​ടെ രാ​ജ്യം) എന്ന ചെ​റു​ക​ഥാ​സ​മാ​ഹാ​ര​വും മറ്റു ചില കഥ​ക​ളും, ഫ്ര​ഞ്ചു​കാ​ര​നായ ജൂ​ലി​യ​സ് വേർണി ന്റെ ‘എൺ​പ​തു​ദി​വ​സം​കൊ​ണ്ടു ലോകം ചു​റ്റി​സ​ഞ്ച​രി​ക്കാം’ ആദി​യായ കഥ​ക​ളും, മറ്റൊ​രു ഫ്ര​ഞ്ചു​കാ​ര​നായ ഫ്രെ​ഡ്രി​ക് ബൂ​തേ​യു​ടെ ‘പര്യ​വേ​ഷ​ണം’ ആദി​യായ കഥ​ക​ളും, പ്ര​സ്തു​ത​ത​രം കൃ​തി​കൾ​ക്കു് ഉദാ​ഹ​ര​ണ​ങ്ങ​ളാ​ണു്. ജൂ​ലി​യ​സ് വേർ​ണ്ണി​ന്റെ കാ​ല​മായ 19-ാം ശതാ​ബ്ദ​ത്തി​ന്റെ ഉത്ത​രാർ​ദ്ധ​ത്തിൽ എൺപതു ദി​വ​സം​കൊ​ണ്ടു ലോകം ചു​റ്റി​സ്സ​ഞ്ച​രി​ക്കുക എന്ന​തു് ഒരു അസാ​ധ്യ​കാ​ര്യ​മാ​യി​രു​ന്നു. ഇന്നാ​ക​ട്ടെ, എൺപതു മണി​ക്കൂർ​കൊ​ണ്ടു് മിൽ​ട്ടൺ റെ​യ്നോൾ​ഡ്സ് ലോകം ചു​റ്റി​സ്സ​ഞ്ച​രി​ക്കു​ന്നു. ചന്ദ്ര​നി​ലേ​യ്ക്കു പോ​കു​ന്ന​തി​നു ജൂ​ലി​യ​സ് വേർൺ നിർ​ദ്ദേ​ശി​ച്ച റോ​ക്ക​റ്റി​നെ (ബാ​ണ​ത്തെ) “സ്റ്റെപ്പ്-​റോക്കറ്റ്” ആയി രൂ​പാ​ന്ത​ര​പ്പെ​ടു​ത്തി​യാൽ, ഈ യാത്ര സാ​ധ്യ​മാ​കു​മെ​ന്നു ഡോ​ക്ടർ ഗൊ​ഡ്ഡാർ​ഡ്, റെ​യിൻ​ഹോൾ​ഡ് ടി​ല്ലി​ങ്ങ്, ആദി​യായ ഇന്ന​ത്തെ ആകാ​ശ​യാ​ന​ശാ​സ്ത്ര​ജ്ഞർ പര്യ​വേ​ഷ​ണം​മൂ​ലം വി​ശ്വ​സി​ക്കു​ന്നു. തന്റെ ‘അദൃ​ശ്യ​നായ മനു​ഷ്യൻ’ എന്ന കഥയിൽ എച്ച്. ജി. വെ​ത്സ്, ശരീരം അദൃ​ശ്യ​മാ​ണെ​ങ്കി​ലും അതി​ന​ക​ത്തു് ചെ​ല്ലു​ന്ന ആഹാ​ര​സാ​ധ​ന​ത്തെ അതു ദഹി​ച്ചു ശരീ​ര​ത്തോ​ടു ലയി​ക്കു​ന്ന​തു​വ​രെ കാ​ണാ​മെ​ന്നു​ള്ള ആശയം ഉൾ​ക്കൊ​ള്ളി​ച്ചി​രി​ക്കു​ന്നു. ആഹാ​ര​സാ​ധ​ന​ഘ​ട​ക​ങ്ങ​ളെ ‘റേഡിയോ-​ആക്ടീവ്’ ആക്കി​ച്ച​മ​യ്ക്കു​ന്ന​താ​യാൽ, അവ പോയി ദഹി​ച്ച ശരീ​ര​ത്തോ​ടു് ലയി​ക്കു​ന്ന​തും മറ്റും കാ​ണാ​മെ​ന്നു​ള്ള ഇന്ന​ത്തെ പ്ര​സി​ദ്ധ വൈ​ദ്യ​ശാ​സ്ത്ര​ജ്ഞൻ മോ​റൻ​പ്ര​ഭു​വി​ന്റെ അഭി​പ്രാ​യം വെ​ത്സി​ന്റെ പ്ര​സ്തുത ആശയം സാ​ധ്യ​മാ​ണെ​ന്നു് സ്ഥാ​പി​ക്കു​ന്നു​ണ്ടു്.

അദ്ധ്യാ​ത്മി​ക​ത്വ​ക്കു​ത്ത​ക​യും, സക​ല​തും ശു​ദ്ധ​മാ​ക്കി​യേ സ്വീ​ക​രി​ക്കു​ക​യു​ള്ളൂ എന്നു് അതു ജനി​പ്പി​ക്കു​ന്ന നി​ഷ്ഠ​യും, വച്ചു പു​ലർ​ത്തി​ക്കൊ​ണ്ടു് പോരുക നി​മി​ത്തം ഭൗ​തി​ക​പു​രോ​ഗ​തി വന്നി​ട്ടി​ല്ലാ​ത്ത ഭാ​ര​ത​ത്തിൽ മു​ക​ളിൽ നിർ​ദ്ദേ​ശി​ച്ച പ്ര​കാ​രം പ്ര​വർ​ത്തി​ക്കേ​ണ്ട​തു് സാ​ഹി​ത്യ​കാ​ര​ന്മാ​രു​ടെ പ്രാ​ഥ​മിക കർ​ത്ത​വ്യ​ങ്ങ​ളിൽ ഒന്നാ​ണെ​ന്നു് പ്ര​ത്യേ​കം പറ​യേ​ണ്ട​തി​ല്ല​ല്ലോ. ഇതു സ്ഥാ​പി​ക്കു​വാ​നാ​യി കുറേ മാ​സ​ങ്ങൾ​ക്കു മു​മ്പു നാഷണൽ കെ​മി​ക്കൽ ലാ​ബോ​റ​റ്റ​റി​യു​ടെ കല്ലി​ടൽ​കർ​മ്മം നിർ​വ്വ​ഹി​ച്ച​പ്പോൽ സർ ശാ​ന്തി​സ്വ​രൂ​പ് ഭട്ട്ന​ഗർ ചെയ്ത പ്ര​സം​ഗ​ത്തി​ലെ ഒരു ഭാഗം ഉദ്ധ​രി​ച്ചു​കൊ​ള്ള​ട്ടെ. ശു​ദ്ധ​സ​യൻ​സി​ന്നു ഭാ​ര​തീയ ശാ​സ്ത്ര​ജ്ഞർ നൽ​കി​യി​ട്ടു​ള്ള സമ്മാ​ന​ങ്ങൾ അവർ​ക്കു് ഒന്നാ​ന്ത​രം ശാ​സ്ത്രീയ ജോലി നിർ​വ്വ​ഹി​ക്കു​വാ​നു​ള്ള കെ​ല്പു​ണ്ടെ​ന്നു് സ്ഥാ​പി​ച്ചി​രി​ക്കു​ന്നു എന്നു പറ​ഞ്ഞ​തി​ന്നു​ശേ​ഷം, അദ്ദേ​ഹം ഇങ്ങ​നെ തു​ട​രു​ന്നു: “ഒരു ശു​ദ്ധ​ശാ​സ്ത്രീയ കണ്ടു​പി​ടി​ത്ത​ത്തിൽ​നി​ന്നും അതു വി​ജ​യ​പൂർ​വ്വം വ്യ​വ​സാ​യ​ത്തിൽ പ്ര​യോ​ഗി​ക്കു​ന്ന​തി​ലേ​യ്ക്കു​ള്ള വഴി സാ​ധാ​ര​ണ​യാ​യി ദീർ​ഘ​വും മു​ഷി​പ്പി​ക്കു​ന്ന​തു​മാ​ണു്. ഈ താ​വ​ള​ത്തിൽ ഒരു ഭാ​ര​തീ​യ​ശാ​സ്ത്ര​ജ്ഞൻ അപൂർ​വ്വ​മാ​യി മാ​ത്ര​മേ എത്തി​ച്ചേ​രാ​റു​ള്ളൂ. അയാൾ തന്റെ കണ്ടു​പി​ടി​ത്തം പ്ര​സി​ദ്ധ​പ്പെ​ടു​ത്തി​യ​യു​ട​നെ അതിനെ പ്രാ​യോ​ഗി​ക​ശാ​സ്ത്ര​ത്തിൽ ഉപ​യോ​ഗ​പെ​ടു​ത്തു​ന്ന​തി​നു​വേ​ണ്ട കെ​ല്പു​ള്ള അന്യ​രാ​ജ്യ​ക്കാർ അപ്ര​കാ​രം ചെ​യ്തു് അതിനെ മു​ത​ലാ​ക്കു​ക​യും ചെ​യ്തു​വ​രു​ന്നു… പല​പ്പോ​ഴും ഈ പ്രാ​യോ​ഗി​ക​ഘ​ട്ട​ത്തിൽ എത്തി​ച്ചേ​രു​ന്ന​തി​നു് അത്യു​ന്ന​ത​ങ്ങ​ളായ ചില ഗു​ണ​ങ്ങ​ളും അദൃ​ഷ്ട​പൂർ​വ്വ​ക​ത്വ​വും​കൂ​ടി ഉണ്ടാ​യി​രു​ന്നേ മതി​യാ​വൂ.” മു​ക​ളിൽ പ്ര​സ്താ​വി​ച്ച നി​യ​ന്ത്രി​ത​ഭാ​വ​ന​യെ​യാ​ണു് ഭട്ട്ന​ഗർ ഒടു​വി​ല​ത്തെ വാ​ച​ക​ത്തിൽ സൂ​ചി​പ്പി​ച്ചി​ട്ടു​ള്ള​തു്.

പരി​താ​പ​ക​ര​മായ ഈ സ്ഥി​തി​യിൽ​നി​ന്നു​ള്ള ഉയർ​ച്ച​യു​ടെ നാ​ന്ദി​യാ​യി പ്ര​സ്തുത തര​ത്തിൽ​പ്പെ​ട്ട ചില സാ​ഹി​ത്യ​കൃ​തി​കൾ ഈയ്യി​ടെ ഭാ​ര​ത​ത്തിൽ ഉണ്ടാ​കു​വാൻ തു​ട​ങ്ങി​യി​രി​ക്കു​ന്ന​തു് ആശ്വാ​സ​ജ​ന​ക​മാ​ണു്. തല​ച്ചോ​റിൽ ശസ്ത്ര​ക്രിയ ചെ​യ്യു​ന്ന​തി​നെ സം​ബ​ന്ധി​ച്ചു് അത്ഭു​ത​ക​ര​മായ പു​രോ​ഗ​തി ഇന്നു് അമേ​രി​ക്ക​യിൽ വന്നി​രി​ക്കു​ന്നു. രണ്ടാ​യി​ര​ത്തിൽ​പ​രം ചി​ത്ത​ഭ്ര​മ​രോ​ഗി​ക​ളു​ടെ തല​ച്ചോ​റിൽ ശസ്ത്ര​ക്രിയ നട​ത്തി അവരെ സാ​ധാ​ര​ണ​മ​നു​ഷ്യ​രാ​ക്കി​ച്ച​മ​യ്ക്കു​വാൻ അമേ​രി​ക്കൻ ഡാ​ക്ടർ​മാർ​ക്കു് സാ​ധി​ച്ചി​ട്ടു​ണ്ടു്. ഈ വി​ഷ​യ​ത്തി​ലു​ള്ള പ്ര​സ്തുത ശാ​സ്ത്രീയ പു​രോ​ഗ​തി​യെ ആസ്പ​ദി​ച്ചു് ഒരു ഭാ​ര​തീ​യ​സാ​ഹി​ത്യ​കാ​ര​നായ ശ്രീ: പു​രു​ഷോ​ത്തമ ത്രി​കും​ദാ​സ് “ദി ലി​വി​ങ്മാ​സ്ക്ക് ” എന്ന ഭാ​വ​നാ​പ​ര​വും ഹാ​സ്യ​ര​സ​പൂർ​ണ്ണ​വു​മായ ഒരു കഥ ഈയ്യി​ടെ പ്ര​സി​ദ്ധ​പ്പെ​ടു​ത്തു​ക​യു​ണ്ടാ​യി. ഭാ​ര​തീ​യ​നായ ഒരു രാ​ഷ്ട്രീ​യ​പ്ര​വർ​ത്ത​ക​ന്റെ തല​ച്ചോ​റു് ആരോ​ഗ്യ​മു​ള്ള ശരീ​ര​വും രോഗം ബാ​ധി​ച്ച തല​ച്ചോ​റു​മു​ള്ള ഒരു യൂ​റോ​പ്യൻ പോ​ലീ​സു​ദ്യോ​ഗ​സ്ഥ​ന്റെ തലയിൽ മാ​റ്റി സ്ഥാ​പി​ക്കു​ന്ന പ്ലാ​േ​ട്ടി​നെ ആസ്പ​ദി​ച്ചു​ള്ള ഒരു കഥ​യാ​ണു് ഇതു്. ഭാ​ഷാ​കാ​ഥി​ക​രും ഇതുൾ​പ്പെ​ടു​ന്ന പ്ര​സ്ഥാ​ന​ത്തിൽ ശ്ര​ദ്ധ പതി​പ്പി​ച്ചാൽ കൊ​ള്ളാം.

ആറ്റം​ബോം​ബി​ന്റെ​യും, ആറ്റോ​മി​ക് പൈൽ​സു​ക​ളു​ടേ​യും രശ്മി​ക​ളേ​റ്റു ഭാ​വി​യിൽ മനു​ഷ്യ​രു​ടെ ലൈം​ഗി​ക​വാ​സന ക്ഷ​യി​ക്കു​ന്ന​താ​ണു്. ഇവ​യേ​റ്റു രണ്ടു​തല മു​ത​ലാ​യ​വ​യു​ള്ള പു​തി​യ​ത​രം രാ​ക്ഷ​സീയ മനു​ഷ്യർ ഭാ​വി​യിൽ ജനി​ക്കു​ക​യും ചെ​യ്യും. തു​ട​രേ​യു​ള്ള ബോം​ബാ​ക്ര​മ​ണം ജനി​പ്പി​ക്കു​ന്ന മനോ​വ്യഥ മനു​ഷ്യ​രെ സ്ത്രീ​പു​രു​ഷ​ഭേ​ദ​മെ​ന്യേ ആബാ​ല​വൃ​ദ്ധം കഷ​ണ്ടി​ത്ത​ല​യ​രാ​ക്കു​ന്ന​താ​ണു്. ബാ​ല​ന്മാ​രു​ടെ ഇട​യ്ക്കു് കണ്ടു​വ​രു​ന്ന അധി​ക​മായ മര​ണ​നി​ര​ക്കു കു​റ​യ്ക്കു​വാ​നാ​യി ഒരു​ത​രം “ഹോർ​മോൺ​സ്” കു​ത്തി​വ​ച്ചു് അവരെ തൽ​ക്കാ​ല​ത്തേ​ക്കു ബാ​ലി​ക​മാ​രാ​ക്കു​ക​യും, ബാ​ല്യം കഴി​യു​മ്പോൾ മറ്റൊ​രു​ത​രം ഹോർ​മോൺ​സ് കു​ത്തി​വ​ച്ചു് വീ​ണ്ടും പു​രു​ഷ​ന്മാ​രാ​ക്കു​ക​യും ചെ​യ്യേ​ണ്ട​താ​ണെ​ന്നു് ഈയ്യി​ടെ ബ്രി​ട്ടീ​ഷ് ശാ​സ്ത്ര​ജ്ഞൻ പ്രൊ​ഫ​സർ ക്രൂ നിർ​ദ്ദേ​ശി​ക്കു​ക​യു​ണ്ടാ​യി. ഇതു ഭാ​വി​യിൽ നട​പ്പിൽ വരു​ത്തു​മ്പോൾ കു​റേ​ക്കാ​ലം സ്ത്രീ​ക​ളാ​യി​രു​ന്ന ഈ പു​രു​ഷ​ന്മാർ സ്ത്രീ​ക​ളോ​ടു പെ​രു​മാ​റു​ന്ന​രീ​തി​യിൽ വലിയ മാ​റ്റം സം​ഭ​വി​ക്കു​വാൻ ഇട​യു​ണ്ടു്. ഏഴാ​യി​ര​ത്തി അഞ്ഞൂ​റു കൊ​ല്ല​ത്തോ​ളം മു​മ്പു് അറേ​ബ്യ​യിൽ പാർ​ത്തി​രു​ന്ന ശി​വ​ഭാ​ര്യ ഉമാ​ദേ​വി ചണ​ത്തിൽ​നി​ന്നു നൂ​ലു​നൂ​റ്റു​ള്ള തു​ണി​നെ​യ്തു ലോ​ക​ത്തിൽ നൂൽ​വ​സ്ത്ര​വ്യ​വ​സാ​യം ഇദം​പ്ര​ഥ​മ​മാ​യി സ്ഥാ​പി​ച്ചു എന്നു് വി​ശ്വ​സി​ക്കു​വാൻ കാ​ര​ണ​മു​ണ്ടു്. നൂൽ നൂ​ല്ക്കുക; നെ​യ്യുക എന്ന ഇര​ട്ട​പ്ര​വൃ​ത്തി​കൾ ഒഴി​ച്ചു​കൂ​ടാ​ത്ത​തായ ഈ പൗ​രാ​ണി​ക​വ്യ​വ​സാ​യ​ത്തെ സം​ബ​ന്ധി​ച്ചു് അതി​വി​പ്ല​വ​ക​ര​മായ ഒരു കണ്ടു​പി​ടു​ത്തം ഇന്ന​ത്തെ അമേ​രി​ക്ക​യിൽ നട​ന്നി​രി​ക്കു​ന്നു. ഒരു അറ്റ​ത്തു പഞ്ഞി വച്ചു​കൊ​ടു​ത്താൽ മറ്റേ അറ്റ​ത്തു തുണി പു​റ​ത്തു തള്ളു​ന്ന ഒരു യന്ത്രം ലാ​ബൊ​റ​ട്ട​റി​യിൽ നട​ത്തിയ പര്യ​വേ​ഷ​ണ​ങ്ങൾ മുഖേന നിർ​മ്മി​ക്കു​വാൻ സാ​ദ്ധ്യ​മാ​ണെ​ന്നു​ള്ള കണ്ടു​പി​ടി​ത്ത​മാ​ണു് ഇതു്. പ്ര​സ്തുത ഇര​ട്ട​പ്ര​വൃ​ത്തി​കൾ കൂ​ടാ​തെ മറ്റു പ്ര​വൃ​ത്തി​കൊ​ണ്ടു വസ്ത്ര​മു​ണ്ടാ​ക്കു​ന്ന ഈ കണ്ടു​പി​ടി​ത്തം പ്രാ​യോ​ഗി​ക​ദ​ശ​യി​ലെ​ത്തു​ന്ന അടു​ത്ത ഭാ​വി​യിൽ, ഗാ​ന്ധി​ജി​യു​ടെ ഗ്രാ​മീ​ണ​ചർ​ക്കാ​പ​ദ്ധ​തി മുഖേന അന്നും വസ്ത്ര​വ്യ​വ​സാ​യം നട​ത്തി​യേ​ക്കാ​വു​ന്ന ഭാ​ര​തീ​യ​രു​ടെ സ്ഥി​തി രസ​ക​ര​മാ​യി​രി​ക്കും. ഇന്ന​ത്തെ ശാ​സ്ത്രീ​യ​പ​ര്യ​വേ​ഷ​ണ​ങ്ങൾ വെ​ളി​പ്പെ​ടു​ത്തു​ന്ന രസ​ക​ര​ങ്ങ​ളായ ഇത്യാ​ദി​കാ​ര്യ​ങ്ങ​ളെ നമ്മു​ടെ സാ​ഹി​ത്യ​കാ​ര​ന്മാ​രായ ഭാ​വ​നാ​പ​ര​മാ​യി പ്ര​തി​പാ​ദി​ക്കു​വാൻ സാ​ധി​ക്കു​മെ​ന്നു കാ​ല​നി​ല്ലാ​ത്ത കാ​ല​ത്തെ അനു​ഭ​വ​ങ്ങ​ളെ നമ്മു​ടെ കു​ഞ്ചൻ​ന​മ്പ്യാർ വി​ജ​യ​പൂർ​വ്വം വർ​ണ്ണി​ച്ചി​ട്ടു​ള്ള​തു് സ്ഥാ​പി​ക്കു​ന്നു​ണ്ടു്. ഇന്ന​ത്തെ ശാ​സ്ത്രീയ കണ്ടു​പി​ടി​ത്ത​ങ്ങ​ളു​മാ​യി, അവയെ പ്ര​തി​പാ​ദി​ക്കു​ന്നു. മാ​ഗ​സിൻ​സ് വാ​യി​ച്ചു, നി​ത്യ​സ​മ്പർ​ക്ക​മു​ണ്ടാ​യാൽ മതി ഇവർ​ക്കു് ഇതു സാ​ധി​ക്കു​വാൻ.

“ഒരു സ്ത്രീ​ക്കു് ഒരു പു​രു​ഷ​നോ​ടു​ള്ള പ്രേ​മ​ത്തിൽ എഴു​പ​ത്തി​യ​ഞ്ചു ശത​മാ​ന​വും ദയയോ, സഹ​താ​പ​മോ കലർ​ന്ന​താ​യി​രി​ക്കും… ഒരു പു​രു​ഷൻ പ്രേ​മി​ക്കു​ന്ന​തു് സ്ത്രീ​യു​ടെ സൗ​ന്ദ​ര്യ​ത്തേ​യോ, അഥവാ, അവ​ളു​ടെ ഗൂ​ഢാ​ത്മ​ക​മായ വ്യ​ക്തി​ത്വ​ത്തെ​യോ ആയി​രി​ക്കും. എന്നാൽ ഒരു സ്ത്രീ സ്നേ​ഹി​ക്കു​ന്ന​തു പു​രു​ഷ​നേ​യ​ല്ല; അവ​ന്റെ പ്രേ​മ​ത്തേ​യാ​ണു് ” എന്നു ഗ്ര​ന്ഥ​കാ​രൻ​ത​ന്നെ വി​വ​രി​ച്ചി​ട്ടു​ള്ള ആശ​യ​ത്തെ ആസ്പ​ദി​ച്ചു​ള്ള ഒരു പ്ലാ​േ​ട്ടും, ക്യാ​ര​ക്ടർ സൃ​ഷ്ടി​യും “പ്ര​തി​കാ​ര​ത്തി​ന്റെ പരി​ണാ​മം” എന്ന കഥയിൽ കാണാം. പ്ര​കൃ​ത​ഗ്ര​ന്ഥ​ത്തി​ന്റെ തല​ക്കെ​ട്ടും ഇതിൽ​നി​ന്നാ​ണു് എടു​ത്തി​ട്ടു​ള്ള​തു്. വി​കാ​ര​ങ്ങ​ളു​ടെ പര​സ്പര വി​രു​ദ്ധ​ങ്ങ​ളായ ഭാ​വ​ദ്വ​യ​ങ്ങൾ (ആം​ബി​വാ​ലൻ​സ്) എന്ന ആശ​യ​മാ​ണു് ഫ്രാ​യ്ഡ് തന്റെ “ടോ​ട്ട​വും ടാ​ബൂ​വും ” എന്ന കൃ​തി​മു​ഖേന മനഃ​ശാ​സ്ത്ര​ത്തി​നു നല്കി​യി​ട്ടു​ള്ള ഏറ്റ​വും അദൃ​ഷ്ട​പൂർ​വ്വ​മായ സമ്മാ​ന​മെ​ന്നു ഡാ​ക്ടർ വൈ​റ്റ് അഭി​പ്രാ​യ​പ്പെ​ട്ടി​രു​ന്നു. ഫ്രാ​യ്ഡി​ന്റെ ഈ ആശ​യ​ത്തെ ആസ്പ​ദി​ച്ചു ആസ്ത്രീ​യ​ക്കാ​ര​നായ സു​പ്ര​സി​ദ്ധ സാ​ഹി​ത്യ​കാ​രൻ ആർതർ ഷ്നി​റ്റ് സ്ലെർ “മരി​ച്ച ഗേ​ബ്രി​യൽ” എന്ന വി​ശ്വ​സാ​ഹി​ത്യ​ത്തി​ലെ ഒരു ഉത്ത​മ​മ​നഃ​ശ്ശാ​സ്ത്ര ചെ​റു​കഥ രചി​ക്കു​ക​യും ചെ​യ്തി​രു​ന്നു. ഇതി​ന്റെ പ്ലാ​േ​ട്ടി​നോ​ടു ശ്രീ. പൊ​റ്റ​ക്കാ​ട്ടി​ന്റെ ഈ കഥ​യു​ടെ പ്ലാ​േ​ട്ടി​നു് ഒരു അകന്ന സാ​ദൃ​ശ്യ​മു​ണ്ടെ​ങ്കി​ലും, മനഃ​ശ്ശാ​സ്ത്ര​ത്തെ പു​ച്ഛി​ക്കു​ന്ന അദ്ദേ​ഹ​ത്തി​ന്റെ പ്ര​തി​പാ​ദ​ന​ത്തിൽ സൈ​ക്കോ​ള​ജി കൊ​ണ്ടു​വ​ന്നി​ട്ടി​ല്ലെ​ന്നു പ്ര​ത്യേ​കം പറ​യേ​ണ്ട​തി​ല്ല​ല്ലോ. ശ്രീ. കു​റ്റി​പ്പു​ഴ​യു​ടെ “വി​ചാ​ര​വി​പ്ല​വം ” ഞാൻ നി​രൂ​പ​ണം ചെ​യ്ത​പ്പോൾ പ്ര​സ്താ​വി​ച്ചി​രു​ന്ന അമേ​രി​ക്ക​ക്കാ​രി ഡാ​ക്ടർ മാർ​ഗ​റ​റ്റ് മിഡി ന്റെ “സെ​ക്സ് ആൻഡ് ടെ​മ്പ​റ​മെ​ന്റ്”, ജർ​മ്മൻ സമു​ദാ​യ​ശാ​സ്ത്ര​ജ്ഞ​രായ മത്തിൽ​ഡ് വേർ​തി​ങ്ങും മാ​ത്തി​യാ​സ് വേർ​തി​ങ്ങും കൂടി രചി​ച്ചി​ട്ടു​ള്ള “ദി ദോ​മി​ന​ന്റു സെ​ക്സ്” എന്നീ കൃ​തി​കൾ നല്കു​ന്ന വെ​ളി​ച്ച​ത്തിൽ, സ്ത്രീ​ക​ളു​ടേ​യും പു​രു​ഷ​ന്മാ​രു​ടേ​യും പ്രേ​മ​ങ്ങൾ​ക്കു് തമ്മി​ലു​ള്ള വ്യ​ത്യാ​സ​ത്തെ സം​ബ​ന്ധി​ച്ചു ശ്രീ. പൊ​റ്റെ​ക്കാ​ട്ടും മറ്റു ചി​ല​രും പു​റ​പ്പെ​ടു​വി​ച്ചി​ട്ടു​ള്ള പ്ര​സ്തുത അഭി​പ്രാ​യം സാർ​വ്വ​ത്രി​ക​മായ ഒരു സത്യ​ത്തിൽ സ്ഥാ​പി​ച്ചി​ട്ടു​ള്ള ഒന്നാ​ണോ എന്നു സം​ശ​യി​ക്കേ​ണ്ട​താ​യി വരു​ന്നു.

മു​ക​ളി​ലു​ദ്ധ​രി​ച്ച ആശ​യ​വി​വ​ര​ണ​ത്തി​ലെ പ്ര​ഥ​മ​വാ​ച​ക​ത്തെ ആസ്പ​ദി​ച്ചു​ള്ള ഒരു വെറും പാ​ട്ടു​ക​ഥ​യാ​ണു് “വന​റാ​ണി”. തനി​ക്കു സഹ​ജ​മായ പ്ര​കൃ​തി​വർ​ണ്ണ​നാ​പാ​ട​വം പ്ര​യോ​ഗി​ച്ചു കഥാ​രം​ഗ​മായ താ​മ​ര​ശ്ശേ​രി​യി​ലെ ഭൂ​പ്ര​കൃ​തി​യു​ടെ ചി​ത്രം വര​ച്ചു് ഈ കഥയെ നല്ല​തായ ഒന്നാ​ക്കു​വാൻ ഗ്ര​ന്ഥ​കാ​രൻ ശ്ര​ദ്ധി​ച്ചി​ട്ടി​ല്ല. ഒരു മല​യാ​ളി ലോ​ഡ്ജി​ലെ അന്ത​രീ​ക്ഷം “ആ ചെ​രി​പ്പു്” എന്ന കഥ​യി​ലും, മം​ഗ​ലാ​പു​ര​ത്തു​നി​ന്നു ബോം​ബ​യ്ക്കു പോ​കു​ന്ന ഒരു നാടൻ കപ്പ​ലി​ലെ അന്ത​രീ​ക്ഷം “ഒരു റു​പ്പി​ക​യു​ടെ കടം” എന്ന​തി​ലും ഗ്ര​ന്ഥ​കാ​രൻ ഭം​ഗി​യാ​യി ചി​ത്രീ​ക​രി​ച്ചി​രി​ക്കു​ന്നു.

ഗ്ര​ന്ഥ​കാ​രൻ: എസ്സ്. കെ. പൊ​റ്റ​ക്കാ​ട്ട്

പ്ര​സാ​ധ​കർ: മം​ഗ​ളോ​ദ​യം ലി​മി​റ്റ​ഡ്, തൃ​ശ്ശി​വ​പേ​രൂർ

വില: 1ക. 8ണ.—മം​ഗ​ളോ​ദ​യം, ചി​ങ്ങം 1123.

(എസ്സ്. കെ. പൊ​റ്റ​ക്കാ​ട്ടി​ന്റെ കഥാ​സ​മാ​ഹാ​ര​ത്തി​നു് കേസരി ബാ​ല​കൃ​ഷ്ണ​പി​ള്ള എഴു​തിയ നി​രൂ​പ​ണം.)

കേസരി ബാ​ല​കൃ​ഷ്ണ​പി​ള്ള​യു​ടെ ലഘു ജീ​വ​ച​രി​ത്രം.