മധുരസംഗീതം പൊഴിച്ചിടുന്ന
മണികളേ, മംഗളാഗാത്രിമാരേ,
ചിരകാല മെന്നിഷ്ടതോഴിമാരായ്
മരുവിന നിങ്ങളിലന്നുമിന്നും,
വിധിവശാൽ വേർപെട്ടോനെങ്കിലും, ഞാ–
നവികല സൗഹൃദമാർന്നിടുന്നു.
പരിശുദ്ധ ‘കുർബാന’ കൊള്ളുവാനായ്
പരിശുദ്ധ മാതാവെ വാഴ്ത്തുവാനായ്
പുലരിയി, ലുച്ചയ്ക്കു, സായാഹ്നത്തിൽ
പലനേരം പാവന വേളകളിൽ
മധുരമായ് നിങ്ങൾ വിളിക്കെ യെന്നുൾ–
ത്തടമേലുന്നാനന്ദവേലിയേറ്റം! [1]
കദനങ്ങളില്ലാതെ കൗമാരത്തിൻ
കളിമടിത്തട്ടിൽ ഞാൻ വാണകാലം,
കറയറ്റിരുന്നതാമെന്റെ പിഞ്ചു–
ഹൃദയത്തിൽ ഭക്തിനാമ്പിട്ടകാലം [2]
നിയതവും നിങ്ങളുതിർത്തിടുന്ന
നിരഘസംഗീതത്തിൻ പൂന്തണലിൽ
സുഖനിദ്രപൂണ്ടു ഞാനെത്രയെത്ര
സുരഭിലസ്വപ്നങ്ങൾ കണ്ടതില്ല! [3]
തെളിവെയിലെങ്ങുമേ താവിടുന്നോ–
രപരാഹ്നവേളയിൽ നിങ്ങൾ തൂകും
സ്വരരാഗ മേളയെക്കാളുമേറെ
മധുരമായ് മറ്റൊന്നില്ലായിരുന്നു. [4]
ചിറകേന്തി യഗ്ഗാനമഞ്ജരികൾ
പ്രസരിക്കേ മന്ദോഷ്ണവായുവിങ്കൽ,
അനുഗമിച്ചീടിനേൻ ഞാനവയെ–
ക്കുതുകാൽ വിടർന്ന മിഴികളാലെ. [5]
ഒരുകൂട്ടമുന്മത്തവെൺപിറാക്കൾ
ഒരുമിച്ചു വന്നുടൻ നാലുപാടും
തുരുതുരെ പ്പാറിപ്പറന്നു നീല–
സുരപഥാന്തത്തിൽ മറയുംപോലെ, [6]
ഒരുവേള പള്ളിയും തൽപുരാണ–
ശവകുടീരപംക്തിയും തൊട്ടുരുമ്മി
അരിയൊരെന്നൂരിൽ മുകളിലൂടാ–
സ്സ്വരമാല വാനിൽ ലയിച്ചിരുന്നു!
ചില കാട്ടുവള്ളിപ്പടർപ്പും പൂപ്പൽ–
പടലവുമേലും പുരയ്ക്കകത്തു
അനിരുദ്ധഗാനനിരതമാരായ്
മരുവുന്ന നിങ്ങളുമായഭംഗം,
പഴകിയ മൈത്രിയ്ക്കു ചേർന്നമട്ടിൽ,
ഹൃദയസംവാദം നടത്തിനേൻ ഞാൻ.
പരിസരമാലസ്യമാണ്ടമരു–
മളവിലീ യാത്മീയസംഗമത്തിൽ
ഹൃദയരഹസ്യങ്ങളെത്ര നമ്മൾ
കലവറയെന്യേ കൈമാറിയില്ല! [7]
സരളസംഗീതസമാർദ്രമായ
നിരുപമാനർഘനിമേഷകങ്ങൾ!
വിറയാർന്നു മെല്ലെ മറഞ്ഞിടുന്നു
ഗതകാല സീമാമതിൽകളിപ്പോൾ,
നെടുനാളായേകാന്തമൂകമാമെൻ–
കരളാതുരത്വമിയന്നിടുന്നു. [8]
മധുരസംഗീതം പൊഴിയിച്ചിടുന്ന
മണികളേ, മംഗളഗാത്രിമാരേ,
കരുണ യിത്തോഴനിലാർന്നിടേണം:
തരികെനിക്കിത്തിരിഭൂതസൗഖ്യം! [9]
തുടുമുഖമാർന്നുഷസ്സെത്തിടുമ്പോൾ
കുടുകുടെ പൊട്ടിച്ചിരിച്ചിടുന്ന,
പകലന്ത്യയാത്ര വഴങ്ങിടുമ്പോ–
ളകതളിർ നൊന്തു കരഞ്ഞിടുന്ന,
അതിരെഴാത്താകാശവീഥി താണ്ടാൻ
നിജനാദ വീചികളെയ്തിടുന്ന,
പ്രിയവാനമ്പാടികൾ ഗോതമ്പപ്പൊൻ–
വയലേലയിങ്കലായ് പാടുംപോലെ
സതതസഞ്ചാരിയാം തെന്നലിന്നു
തുണയായ്ത്തൻ താനങ്ങൾ തൂകിടുന്ന,
ഒരു ഭേദമെന്നിയേ പുൽത്തറയും
പെരുന മൂർദ്ധാവും മുത്തിടുന്ന
മണികളേ, നിങ്ങൾതൻ മഞ്ജുഗാന–
കലവിതൻ വെള്ളിച്ചിറകുകളിൽ [10]
സദയ മെന്നാത്മാവെ ക്കൊണ്ടുപോകൂ
കമനീയ ഭൂതകാലാംബരത്തിൽ! [11]