[1] വാര്‍വലപോലെ – വേടന്‍ പക്ഷികളെ പിടിപ്പാന്‍ വലിയ വല വിരിയ്ക്കുന്നതുപോലെ, അങ്ങു രക്ഷോഹനനത്തിന്നു തേജസ്സു പരത്തുക. ഇഭസേവി = ആനപ്പുറത്തു കേറിയവൻ. സാമാത്യന്‍ = അമാത്യാന്വിതൻ. നൃപന്‍പോലെ – രാജാവു ശത്രുസൈന്യത്തിന്റെ നേരെ ചെല്ലുന്നതുപോലെ, അങ്ങു രാക്ഷസരെ ഹനിപ്പാൻ ചെല്ലുക. തള്ളും – തട്ടിനീക്കുന്ന. എരിയമ്പ് – തേജസ്സാകുന്ന പൊള്ളിയ്ക്കുന്ന ശരം. അരക്കനില്‍ എയ്താലും.

[2]ഇപ്പടുദീപ്തിയാല്‍ – ശത്രുക്കളെ അമർത്താന്‍ കഴിവുള്ള ഈ തേജസ്സുകൊണ്ടു ക്രമേണ വൈരികളെ തൊടുക. ഇതിന്റെ വിവരണമാണ്, ഉത്തരാർദ്ധം: പൊരികൾ – തീപ്പൊരികൾ. ഉല്ക്ക – തീക്കൊള്ളി. വിലക്കപ്പെടാത്ത – ആരാലും തടയപ്പെടാത്ത.

[3] നേർക്ക് – ശത്രക്കളുടെ നേരെ. ചാരര്‍ – നാട്ടിലെ ഉള്ളുകള്ളികളറിയാന്‍ അയയ്ക്കപ്പെടുന്നവര്‍; രശ്മികളാണ്, അഗ്നിയുടെ ചാരന്മാര്‍. പ്രവേഗി = വേഗമേറിയവന്‍. നിന്‍ഞങ്ങളെ – അങ്ങയുടെ ആളുകളായ ഞങ്ങളെ.

[4] കല്പിച്ചെണീയ്ക്ക – രക്ഷോഹനനത്തിന്നൊരുങ്ങുക. ചുടുക – ദഹിപ്പിച്ചാലും. അങ്ങ് = ഭവാന്‍.

[5] മികവുള്ളോരെ – രാക്ഷസരെ. എയ്ക – തേജശ്ശരംകൊണ്ട്. യാതു = രക്ഷസ്സ്. ജ്ഞാതി – ഞങ്ങളുടെ ചാർച്ചക്കാരന്‍.

[6] ശുഭാഗമന്‍ – അഗ്നിയുടെ ആഗമനം മംഗളകരമാണല്ലോ. നേതാവ് = തലവന്‍. തദ്ഗേഹേ = അവന്റെ ഗൃഹത്തില്‍. ധനങ്ങൾ ആളും – രത്നകനകാദികൾ വന്നുചേരും.

[7] ദുര്‍ല്ലഭായുസ്സു – കിട്ടാന്‍ പ്രയാസമുള്ള ദീഗ്ഘായുസ്സ്. എല്ലാം സുദിനമാക – എല്ലാദ്ദിനവും സുദിനമായിവരട്ടെ.

[8] ഈ മൊഴി – എന്റെ വാക്കു ഭവല്‍സ്തുതിയായിബ്ഭവിയ്ക്കട്ടെ. സദ്രഥാശ്വാഢ്യരായ് – നല്ല തേരുകളം കുതിരകളുമുള്ളവരായിട്ട്. സേവിച്ചിടാം – അങ്ങയെ പരിചരിച്ചുകൊള്ളാം.

[9] ഇങ്ങ് – ഈ ലോകത്തില്‍. ആൾകൾ = ആളുകൾ. സ്വയം നിന്നെ അന്വഹം തുലോം സേവിയ്ക്കുവോർ – സേവിച്ചുപോരുന്നു; ഞങ്ങളും ത്വല്‍പ്രസാദത്താല്‍ ശത്രുസമ്പത്തടക്കി, സന്താനങ്ങളുമായി രമിച്ചു, സച്ചിത്തരായ് (വിശുദ്ധഹൃദയരായി) സേവിയ്ക്കുമാറാകണം!

[10] വസ്തുക്കൾ വെച്ച – നെല്ലും മറ്റും കേററിയ. സവിത്തനായ് – യാഗത്തിന്നു വേണ്ടുന്ന ധനത്തോടേ. ഭവാങ്കല്‍ എത്തും – ഭവാനെ പരിചരിപ്പാൻ സമീപിയ്ക്കും. ആതിഥ്യം = അതിഥിയോഗ്യമായ സല്‍ക്കാരം, പൂജ.

[11] ഇത്താതഗോതമാവാപ്തസ്തവോത്ഥം = അച്ഛനായ ഗോതമങ്കല്‍നിന്നു കിട്ടിയ (അച്ഛൻ ഉപദേശിച്ച) ഈ സ്തോത്രത്താലുണ്ടായത്. മിത്രത – ഭവത്സഖ്യം. വമ്പരെ – രാക്ഷസക്കൂറ്റന്മാരെ. ചീന്തട്ടെ – പിളർത്തട്ടെ, കൊല്ലട്ടെ. വാക്ക് – സ്തുതി.

[12] ബാധ – ശത്രുപീഡ. അലസാതെ മടിയില്ലാതെ. ഇരുന്ന് – ഞങ്ങളുടെ യാഗത്തില്‍ ഉപവേശിച്ച്.

[13] മമത എന്ന ഉചഥ്യപത്നിയുടെ മകന്‍ ദീർഗ്ഘതമസ്സു ബൃഹസ്പതി ശാപത്താല്‍ സംഭവിച്ച ജാത്യന്ധതയില്‍നിന്ന് അഗ്നിപ്രസാദത്താല്‍ വിമുക്തനായി എന്ന ഇതിഹാസം മുമ്പുണ്ട്. ഇച്ഛിച്ച മാററാര്‍ – ദ്രോഹിപ്പാനൊരുങ്ങിയ ശത്രുക്കൾ അവന്ന് അഴല്‍ വരുത്താന്‍ ശക്തരായില്ല.

[14] ഉത്തരവ് = അനുജ്ഞ. ഇരുദുഷ്ടര്‍ – അടുത്തും അകലത്തുമുള്ള ദ്രോഹികൾ. ഇത് – ഈ സൂക്തത്തില്‍ അപേക്ഷിയ്ക്കപ്പെട്ടത്. അലജ്ജിതചാരിന്‍ = ലജ്ജകൂടാതെ സഞ്ചരിയ്ക്കുന്നവനേ, ലജ്ജിയ്ക്കത്തക്കതൊന്നും ചെയ്തിട്ടില്ലാത്തവനേ.

[15] ഗീതി – സ്തുതി. നിന്ദനദ്രോഹദുഷ്പേര് – എതിരാളിയുടെ നിന്ദനം, ദ്രോഹം, അപവാദം എന്നിവ.